सुप्रिम म्हसकर, साम टीव्ही, प्रतिनिधी

शिवसेनेच्या फुटीची सल काही केल्या शिवसैनिकांच्या मनातून जात नाही. त्यामुळे वारंवार शिवसेनेच्या दोन्ही गटांकडून शिवसेनेच्या फुटीबद्दल वेगवेगळे दावे केले जातात. अशातच आता शिंदेसेनेचे कोकणातील शिलेदार मंत्री भरत गोगावले यांनी फुटीच्या कारणाची पुन्हा एकदा उजळणी केली. त्यात आतापर्यंत कधीही पुढे न आलेला नवा दावा केला गेलाय. बाळासाहेबांनी कधीही मॉ साहेबांचं ऐकलं नाही, असं म्हणत गोगावलेंनी शिवसेनेच्या फुटीला कोण कारणीभूत आहे त्यावर भाष्य केलयं. त्यामुळे आता मातोश्रीवर नव्या मॉ साहेबांचा आदेश चालतो का? असा सवाल उपस्थित झालाय. गोगावलेंनी नेमकं काय म्हणाले पाहूयात...

भरत गोगावलेंनी रश्मी ठाकरेंवर नेमके काय आरोप केले... पाहूयात..

शिवसेनेच्या फुटीमागे वहिनींचा हात?

- रश्मी ठाकरेंमुळे शिवसेनेत उभी फुट पडली

- रश्मी ठाकरेंकडून आदित्य ठाकरेंना मंत्रीपद देण्याचा हट्ट

- रश्मी ठाकरेंमुळे एकनाथ शिंदे मुख्यमंत्री होऊ शकले नाहीत

- तिकिट वाटपात रश्मी ठाकरेंचा हस्तक्षेप

- राणे, भुजबळ आणि राज ठाकरेंच्या मनोमिलनात रश्मी ठाकरेंचा खोडा

दरम्यान राज ठाकरे आणि उद्धव ठाकरे यांच्या युतीची चर्चा सुरु झाल्यानंतर नितेश राणेंनी असाच आरोप केला होता. उद्धव ठाकरेंना राज ठाकरेंसोबत युती करण्यासाठी रश्मी ठाकरेंची परवानगी घ्यावी लागेल, असा दावा नितेश राणेंनी केला होता. दरम्यान ठाकरे गटाचे आमदार भास्कर जाधवांनी गोगावलेंच्या दाव्याला उत्तर देणं टाळलंय.

आजवर रश्मी ठाकरेंवर अनेकदा आरोप झाले पण ठाकरेंनी कधीच या मातोश्रीतील गोष्टी बाहेर येऊ दिल्या नाहीत. आणि आताही ठाकरेंच्या कधीकाळच्या शिलेदारांनी थेट मातोश्रीच्या या नव्या मॉसाहेबच्याच हातीच युती आघाडीचा रिमोट कंट्रोल असल्याचं म्हटल्यानं आता तरी रश्मी ठाकरे या आरोपांना उत्तर देणार का हे पाहणं महत्त्वाचं असेल.