चेतन व्यास 
वर्धा : मार्केटमध्ये न जाता ऑनलाईन शॉपिंग करण्याची सवय अनेकांना लागली आहे. यासाठी ऑनलाइन शाॅपिंग करण्यासाठीच्या अनेक साईट देखील आहेत. मात्र यातून काही साईट या फसव्या असून यातून फसवणूक केली जात असते. अशाच प्रकारे ऑनलाईन करणे महिलेला महागात पडले असून ९९७ रुपयांचा ड्रेस खरेदी केल्यानंतर १ लाख रुपयांत फसवणूक झाल्याचे प्रकार वर्धा येथे समोर आली आहे. 

वर्धा जिल्ह्यातील म्हसाळा येथील राखी विठ्ठल रघाटाटे (वय ४६) यांनी एका ऑनलाइन साइट ओपन केल्यानंतर त्यांना एक ड्रेस पसंतीस पडला. याची किंमत ९९७ रुपये इतकी होती. हा ९९७ रुपयांचा ड्रेस त्यांनी खरेदी केला होता. ऑर्डर केल्यानंतर ड्रेस घरी देखील आला होता. मात्र तो ड्रेस त्यांना आवडला नसल्याने परत केला. काही दिवसांनी पेड केलेली रक्कम परत मिळेल असे सांगण्यात आले होते. 

दरम्यान बराच दिवसांचा कालावधी गेल्यानंतर देखील याचा रिफंड त्यांना आला नाही. यामुळे महिलेने कस्टमर केअर क्रमांकावर कॉल केला असता त्यांनी व्हाॅट्सॲपवर संपर्क साधण्यास सांगितले. महिलेने व्हॉट्सॲपवर संपर्क केला असता त्यांनी गुगल पे, फोन पे क्रमांक तसेच पिनकोड मागितला. महिलेने ते दिले असता तिच्या व्हाॅट्सॲपवर एपीके फाइल पाठवून डाउनलोड करण्यास सांगितले.. 

फाईल डाउनलोड करताच अकाउंटमधून रक्कम गायब  

फाइल डाउनलोड करताच महिलेच्या बँक खात्यातून ८५ हजार आणि १५ हजार असे एकूण १ लाख रुपयांची कपात झाली. ऑनलाइन फसवणूक झाल्याचे लक्षात येताच महिलेने याबाबतची तक्रार सायबर पोलिस ठाण्यात दिली. पोलिसांनी याप्रकरणी गुन्हा दाखल केला असून पोलिसांकडून याचा तपास सुरु करण्यात आला आहे.