चेतन व्यास 
वर्धा : सध्या सायबर गुन्हेगारांकडून विविध वेगवेगळे फंडे वापरून सर्वसामान्यांची आर्थिक फसवणूक करण्याचे प्रकार समोर आले आहेत. अशीच एक घटना वर्धेच्या आर्वी शहरात घडली. यात एका महिलेला विदेशी गिफ्ट पाठवून कस्टम विभागाने पकडल्याने त्यात विदेशी चलनाचे नाणे सापडले आहे. पोलिस केस टाळण्यासाठी पैशांची मागणी केली. यातून महिलेने २७ लाख ३८ हजार रुपयांची रक्कम दिल्याचा प्रकार उजेडात आला. याप्रकरणी सायबर पोलिसात गुन्हा दाखल करण्यात आला आहे.

सोशल मीडियाचा वापर मोठ्या प्रमाणात होत आहे. याचा फायदा घेत सायबर गुन्हेगार नागरिकांना आपल्या जाळ्यात अडकवत आहे. ऑनलाईन शॉपिंग, खोट्या गुन्ह्यात अडकल्याची बतावणी करणे, लॉटरी लागणे यासह विविध प्रकारचे फंडे वापरून नागरिकांना आपल्या जाळ्यात अडकवत असतात. भीतीपोटी नागरिक लाखो रुपयांनी गंडविले जातं आहे. असाच प्रकार वर्धा जिल्ह्यात उघडकीस आला आहे.   

सोशल मीडियावरील ओळख पडली महागात 
वर्धा जिल्ह्यातील आर्वी शहरातील रहिवासी महिलेची एका अज्ञात व्यक्तीशी इन्स्टाग्रामवर ओळख झाली. यात अज्ञाताने आपण विदेशात राहत असल्याचे सांगितले. इन्स्टाग्रामवर बोलत असताना विदेशातून गिफ्ट पाठवत असल्याचे सांगितले होते. त्यानंतर सदर गिफ्ट पाठविल्यानंतर ते गिफ्ट कस्टम विभागाने पकडले असून ते सोडविण्याच्या नावावर विविध टॅक्स, तसेच गिफ्टमध्ये विदेशी चलनाच्या नाणी सापडल्यामुळे त्याची पोलिस केस न होऊ देण्याच्या पैशांची मागणी केली होती. 

भीतीपोटी महिलेने रक्कम केली ट्रान्सफर 

दरम्यान समोरच्याने महिलेच्या मनात भीती घातली. यामुळे महिलेने भीतीपोटी वेळोवेळी एकूण २७ लाख ३८ हजार रुपये समोरच्याने दिलेल्या बँक खात्यात ट्रान्सफर केली. मात्र या प्रकारात आपली फसवणूक झाल्याचे लक्षात येताच महिलेने सायबर पोलिस ठाणे गाठून याबाबतची तक्रार दिली. सायबर पोलिसांनी याप्रकरणात गुन्हा दाखल करत पुढील तपास सुरु केला आहे.