कोल्हापूर : भाजपचे नेते किरीट सोमय्या यांनी महाविकास आघाडी सरकार मध्ये असलेले ग्रामविकासमंत्री व कोल्हापूरचे पालकमंत्री हसन मुश्रीफ याच्या विरोधात घोटाळ्याचे आरोप केले होते. या प्रकरणी किरीट सोमय्या यांनी काही दिवसांअगोदर कोल्हापूर पोलीस स्थानकात तक्रार करण्याकरिता जाणार होते. मात्र, सुरक्षेच्या कारणास्तव मुंबई पोलिसांनी त्यांना मुंबई बाहेर जाण्यास मज्जाव करण्यात आलेला होता.

या प्रकरणावरून आता राज्यामधील राजकारण मोठ्या प्रमाणात तापले आहे. यातच आता मुंबई सहपोलिस आयुक्त विश्वास नांगरे पाटील आपल्या पदाचा गैरवापर करुन, महाविकास आघाडी सरकारचे माफिया म्हणून काम करत आहेत. याच द्वेषामधून त्यांनी मला ६ तास घरात कोंडून ठेवल्याचा आरोप भाजपा नेते किरीट सोमय्या यांनी केला आहे.

हे देखील पहा-

यासंदर्भात किरीट सोमय्या यांनी विश्वास नांगरे पाटलांविरोधामध्ये आता राष्ट्रीय मानवाधिकार आयोगाकडे तक्रार करण्यात आली आहे. या तक्रारीत सोमय्यांनी सांगितले आहे की, कोल्हापूरला जात असताना मला मुंबई मध्ये रोखले होते. तसेच मला घरात डांबून ठेवण्यात आले होते. या घोटाळेबाजांना वाचवण्याकरिता नांगरे पाटील यांनी पदाचा गैरवापर केला आहे.

यावर आता राष्ट्रीय मानवाधिकार आयोगाचे सदस्य डॉ. ज्ञानेश्वर मुळे यांनी, भाजपा नेते किरीट सोमय्या यांनी सरकारी अधिकाऱ्यांसंदर्भात राष्ट्रीय मानवाधिकार आयोगाकडे तक्रार करण्यात आली असेल, त्यासंदर्भात सर्वप्रथम राज्य सरकारला विचारणा करुन, कृती अहवाल मागविला जाणार असल्याची माहिती दिली आहे. डॉ. मुळे पुढे म्हणाले की, किरीट सोमय्या यांची तक्रार अद्याप माझ्यापर्यंत पोहचली नाही.

माझ्याशिवाय ती अन्य सदस्यांकडे देखील येऊ शकते. परंतु, एका शासकीय अधिकाऱ्यांविरोधात ही तक्रार असल्यामुळे त्यासंदर्भात महाराष्ट्र सरकारला काय कारवाई झाली याबाबच अहवाल मागितला जाणार आहे. त्यांनतरचं प्रकरण आयोगाकडून हाताळले जाणार आहे.

दरम्यान सोमय्या यांनी दिल्लीत केंद्रीय पंचायत राज राज्यमंत्री कपिल पाटील यांची भेट घेतली आहे. ग्रामविकासमंत्री हसन मुश्रीफ यांच्याविरोधात घोटाळ्याची माहिती देखील दिली आहे. मुश्रीफ यांनी आपल्या अधिकारांचा गैरवापर करून आपल्या जावयाला कंत्राट दिल्याचा आरोप सोमय्या यांनी केला आहे.

Edited By- Digambar Jadhav