Maharashtra Political News: राज्याच्या राजकारणात आज मोठ्या घडामोडी पाहायला मिळाल्या. अजित पवार भाजपसोबत जाणार असल्याच्या चर्चा कालपासून सुरु होत्या. मात्र अजित पवारांनी दिलेल्या स्पष्टीकरणानंतर या सर्व चर्चांना पूर्णविराम मिळाला. या सर्व घडामोडींमध्ये भाजप नेते विनोद तावडेंच्या नावाचीही चर्चा होती. (Maharashtra Political News)

विनोद तावडे यांनी काही दिवसांपूर्वी महाराष्ट्रासंदर्भात आगामी लोकसभा निवडणुकीबाबत केंद्रीय नेतृत्वाकडे अहवाल सादर केल्याचं बोललं जात होतं. मात्र विनोद तावडे यांनी स्वत: याबाबत ट्वीट करत स्पष्टीकरण दिलं आहे. अशा प्रकारचा कोणताही अहवात मी सादर केला नसल्याचा विनोद तावडेंनी म्हटलं आहे.

विनोत तावडे यांनी ट्वीट करत म्हटलं की, दिवसभर माध्यमांद्वारे मी कोणता तरी अहवाल सादर केला आहे ज्यात राज्यात भाजपाची ताकद कमी झाल्याचा दावा केला जात आहे. असा कोणताही अहवाल मी सादर केला नसून, भाजपाची शक्ती शिंदे - फडणवीस सरकार आल्यानंतर उलट वाढलीच आहे. पंतप्रधान मोदीजींच्या नेतृत्वात झालेल्या विकासामुळे महाराष्ट्रात भाजपा अधिक मजबूतच झाली आहे. (Breaking Marathi News)

आगामी निवडणुकीत भाजपला फटका बसणार?

2019 च्या तुलनेत यावेळी भाजपच्या जागा घटणार. भाजपला महाराष्ट्र, बिहार, कर्नाटकात फटका बसणार, असा अहवाल विनोद तावडे यांच्या समितीने दिला असल्याची चर्चा सुरू झाली होती. याच अहवालामुळे राष्ट्रवादी आणि काँग्रेसचे काही नेते भाजपच्या टार्गेटवर असल्याच्या चर्चा रंगल्या होत्या. (Latest Marathi News)

अजित पवार यांचा खुलासा

दरम्यान भाजपसोबत जाणार असल्याच्या चर्चेवर राष्ट्रवादीचे नेते अजित पवार यांनी पत्रकारपरिषद घेत स्पष्टीकरण दिलं. जीवात जीव असेपर्यंत आपण राष्ट्रवादी काँग्रेसमध्येच राहणार असल्याचं अजित पवारांनी स्पष्ट केलं. आपल्याबाबत केवळ गैरसमज पसरवण्यात आला असून आपण ४० आमदारांच्या सह्या घेतल्याच्याही अफवा असल्याचं अजित पवारांनी नमूद केलं. यावेळी त्यांनी सामनातल्या अग्रलेखावरून संजय राऊत आणि शिंदे गटाचे प्रवक्ते संजय शिरसाटांचेही कान टोचले.

Edited by - Satish Daud