>>सुशांत सावंत

CM Eknath Shinde: मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्या नेतृत्वातील सरकारच्या पहिल्या अधिवेशनाला आजपासून सुरुवात झाली आहे. आज राज्यपाल रमेश बैस यांच्या अभिभाषणाने सुरुवात झाली आहे. हे अधिवेशन 25 मार्चपर्यंत सुरु राहणार असून वित्तमंत्री देवेंद्र फडणवीस अर्थसंकल्प सादर करणार आहेत.

दरम्यान, मुख्यमंत्री एकनाथ शिंदे यांनी महाविकासआघाडी सरकारने देवेंद्र फडणवीस आणि गिरीश महाजनांना अटक करण्यासाठी प्रयत्न केले होते असा गंभीर आरोप केला आहे. यानंतर राज्यातील राजकारणाचा पारा चढला आहे. एकीकडे शिंदे यांनी महाजनांचा संदर्भ देत महाविकास आघाडीवर आरोप केला तर दुसरीकडे या दोघांची मैत्री पहायला मिळाली.

विधीमंडळाचं कामकाज संपल्यानंतर विधान भवनातून बाहेर पडताना अशी एक गोष्ट घडली ज्यामुळे मुख्यमंत्री एकनाथ शिंदे आणि गिरीश महाजन यांच्यातील मैत्रीची एक झलक पहायला मिळाली.

विधानभवनातून बाहेर पडताना पायऱ्यांवर मुख्यमंत्री एकनाथ शिंदेंचा तोल गेला, मात्र त्यांच्या सोबत चालणारे भाजपचे नेते गिरीश महाजन यांनी तात्काळ मुख्यमंत्र्यांना सावरले. या घटनेचा एक व्हिडिओ सोशल मीडियावर व्हायरल होत आहे. (Latest Marathi News)

विधिमंडळाच्या अर्थसंकल्पीय अधिवेशनाच्या पहिल्या दिवशी मराठी भाषेला अभिजात भाषेचा दर्जा देण्याच्या मुद्द्यावरून विरोधकांनी आक्रमक भूमिका घेतली. यावर बोलताना मुख्यमंत्री शिंदे यांनी 'मराठीला अभिजात भाषेचा दर्जा देण्यासाठी राज्याचं एक शिष्टमंडळ पंतप्रधान मोदींची भेट घेईल अशी माहिती दिली. (Latest Political News)