Vasota Fort News : सह्याद्री व्याघ्र प्रकल्पातील बामणोली (sahyadri tiger reserve bamnoli) परिक्षेत्रातील वासोटा किल्ला पर्यटनासाठी (vasota trek) आजपासून (ता. 16 जून) बंद करण्यात आला आहे. तरी सर्व पर्यटक, पर्यटन व्यावसायिक व बोट क्लब यांनी याची नाेंद घ्यावी असे आवाहन बा.दि.सबनिस (वनक्षेत्रपाल वन्यजीव, बामणोली) यांनी केले आहे. (Maharashtra News)

सातारा जिल्ह्यातील घनदाट कोयने अभयारण्यात वासोटा किल्ला नावाचा वनदुर्ग आहे. व्याघ्रगड हे या किल्ल्याचे दुसरे नाव आहे. साहसी गिर्यारोहकांना हा किल्ला परिपूर्ण वाटताे. किल्ल्यामध्ये पाण्याची टाकी, राजवाड्याचे अवशेष, शिवमंदिर आहे आणि बाबूकडा नावाने ओळखला जाणारा मोठा किनारा हे त्याचे सर्वात उल्लेखनीय वैशिष्ट्य आहे. हा किल्ला सर करण्यासाठी देश-परदेशातून पर्यटक येत असतात.

दरम्यान जून ते आॅक्टाेबर या कालावधीत हा किल्ला पर्यटनासाठी प्रतिवर्षी बंद ठेवण्यात येताे. यंदा आजपासून (ता.16 जून) या किल्ल्यावर पर्यटनासाठी बंदी घालण्यात आली आहे. पुढील पर्यटन हंगाम सूरु होण्याविषयीच्या सूचना पावसाळ्यानंतर वरिष्ठ कार्यालयाचे आदेशांप्रमाणे देण्यात येतील असे अधिका-यांनी साम टीव्हीशी बाेलताना स्पष्ट केले.

बा.दि.सबनिस (वनक्षेत्रपाल वन्यजीव, बामणोली) म्हणाले बहुतांश वन्य प्राण्यांचा प्रजननचा कालावधी असताे. या काळात पर्यटक वासाेटा किल्ल्यावर आल्यास वन्य प्राण्यांना अडचणीचे ठरु शकते. त्याचप्रमाणे परिसरात माेठ्या प्रमाणात पाऊस पडताे. किल्ला मार्गावरील नाले, आेढे , आेव्हळाचे पाणी वेगाने वाहत असते.

तसेच अतिपावसामुळे भूस्खलन हाेण्याची शक्यता असते. त्यामुळे अपघात घडू शकतात. हे टाळण्यासाठी जून ते आॅक्टाेबर या कालावधीत वासाेटा किल्ला पर्यटनासाठी बंद ठेवण्यात आला आहे. तरी सदर कालावधीत वासोटा येथे प्रवेश वर्जित असून कोणी प्रवेश केल्याचे आढळल्यास प्रचलित कायदा व नियमांप्रमाणे कारवाई करण्यात येईल असेही स्पष्ट करण्यात आले आहे.

Edited By : Siddharth Latkar