धावत्या सोलापूर वंदे भारत एक्स्प्रेसमध्ये प्रवाशांने धूम्रपान केल्यामुळे आपत्कालीन अग्निशमन यंत्रणा कार्यान्वित झाली. त्यामुळे प्रवाशांमध्ये गोंधळ उडालेला होता. परंतु, आरपीएफ पोलिसांनी धूम्रपान करणाऱ्या प्रवाशाला अटक केली आहे. या गोंधळामुळे मंकी हिल घाट परिसरात काही वेळ वंदे भारत ट्रेन खोळंबली होती.

मिळालेल्या माहितीनुसार, ट्रेन क्रमांक २२२२६ सोलापूर मुंबई वंदे भारत एक्स्प्रेस सोलापूरवरून मुंबईसाठी सुटली. त्यानंतर ही मंकी हिल घाट परिसरात आली असताना सी-१ डब्यातील अग्निशोधक यंत्रणा कार्यान्वित झाली. गाडीतील रेल्वे कर्मचाऱ्यांनी संबंधित डब्याकडे धाव घेतली. मात्र डब्यात आग लागल्याची कोणतीही घटना घडल्याचे दिसले नाही. आरपीएफ पोलिसांनी यांसंदर्भात चौकशी केली असता, वंदे भारत एक्स्प्रेसमधील सी-१ मधील प्रवासी विकास पाठक डब्यात धूम्रपान करत असल्याचे आढळून आले.

त्यामुळे वंदे भारत ट्रेनमधील अग्निशोधक यंत्रणा कार्यान्वित झाली. दरम्यान आरपीएफ पोलिसांनी दोषी प्रवाशांना कल्याण स्थानकात उतरवण्यात आले. रेल्वे सुरक्षा दलाने त्याला अटक करून रेल्वे न्यायालयात हजार करण्यात आले असून त्याच्यावर कारवाई झाली आहे.