Mumbai: उत्तरप्रदेशचे मुख्यमंत्री योगी आदित्यनाथ सध्या मुंबई दौऱ्यावर आले आहेत. या मुंबई दौऱ्यामध्ये ते आज ( ५, जानेवारी) ला मुंबईला रोड शो करणार आहेत. या रोड शोमध्ये मुख्यमंत्री एकनाथ शिंदेही सहभागी होणार आहेत, त्याचबरोबर योगी आदित्यनाथ या रोड शोच्या माध्यमातून अनेक उद्योजकांची तसेच सिने कलाकारांची भेट घेणार आहेत.

मात्र योगी आदित्यनाथ यांच्या मुंबईमधील रोड शो ला शिवसेना ठाकरे गटाचे नेते संजय राऊत (Sanjay Raut) यांनी विरोध दर्शवला आहे. या संबंधी त्यांनी पत्रकारांशी संवाद साधताना जोरदार टीका केली आहे.

याबाबत अधिक माहिती अशी की, उत्तर प्रदेशचे मुख्यमंत्री योगी आदित्यनाथ (Yogi Adityanath) यांच्या मुंबईमधील रोड शोवर संजय राऊत यांनी जोरदार टीका केली आहे. यावेळी पत्रकारांशी संवाद साधताना "योगी इथे मुंबईत कशाला रोड शो करत आहेत. आमच्याकडचे उद्योगधंदे ओरबाडून नेणार असेल तर आक्षेप आहेच. गुंतवणुकीसाठी रोड शो कशासाठी," असा सवाल करत त्यांनी जोरदार टीका केली आहे.

त्याचबरोबर "राजकीय उद्योग इथे नका करु, मुंबईतून फिल्मीसिटी घेवून जाणार आहात का? परंतु लोक तर इथे काम करतात," अशा शब्दात त्यांनी योगी आदित्यनाथ यांच्यावर टीका केली आहे. यावेळी संजय राऊत यांनी शिंदे गटाचे नेते खासदार राहुल शेवाळे यांनी टाकलेल्या अब्रू नुकसानीच्या दाव्याचीही खिल्ली उडवली आहे.

याबद्दल बोलताना संजय राऊत यांनी माझ्यावर अब्रु नुकसानीचा दावा अरे बापरे, अनुबॉंम्ब पडल्यासारखं वाटतंय, असे म्हणत त्यांनी खिल्ली उडवली आहे. दरम्यान, चंद्रशेखर बावनकुळे यांनी औरंगजेबजी असा केलेला उल्लेख म्हणजे त्यांच्या पोटात होत तेच ओठावर आलं असा टोलाही त्यांनी यावेळी लगावला आहे.