कधी ठाकरे गटाचे आमदार शिंदे गटात जातील...तर कधी शिंदे गटाचे ठाकरे गटात जाणार अशा चर्चा शिवसेनेत फूट पडल्यानंतर गेल्या दोन वर्षांपासून राज्यात रंगत असतात. मात्र आता ठाकरे आणि शिंदे गट एकत्र येण्याच्या चर्चांना उधाण आलंय. कारण थेट राजधानी दिल्लीत ठाकरे-शिंदे संघटित होण्याचा नारा देण्यात आलाय. महाराष्ट्र सदनाबाहेर शिवसेनेच्या दोन्ही गटांनी संघटित होण्याचं आवाहन करणारं मोठं बॅनर निनावी शिवसैनिकांनी झळकवलंय. या बॅनरवर नेमकं काय लिहिलंय ते जणू घेऊ..

राजधानीत शिवसेना एकीचा नारा

शिवसैनिकांनो, वाघांनो... संघटित व्हा ! महाराष्ट्राच्या विकासाला गतिशील बनवा ! आपल्या सर्वांना मन:पूर्वक शुभेच्छा, असं या बॅनरवर लिहिलं अहे.

विशेष म्हणजे या बॅनरचं शिंदे गटानं स्वागतच केलंय. दोन्ही गट एकत्र येत असतील तर आनंदाचीच गोष्ट आहे अशी प्रतिक्रिया शिंदे गटाचे प्रवक्ते संजय शिरसाट यांनी दिलीय. आता तुम्हाला प्रश्न पडला असेल की ठाकरे गटाला या बॅनरबद्दल काय वाटतं? तर सामान्य शिवसैनिकाला असं वाटत असेल तर त्याचं स्वागतच आहे. मात्र याचा सर्वस्वी निर्णय ठाकरेंच्या हातात असल्याचं सांगायलाही सुषमा अंधारे विसरल्या नाहीत.

लोकसभा निवडणुकीत राष्ट्रवादी काँग्रेसच्या तुलनेत शिवसेनेच्या दोन्ही गटांची समाधानकारक कामगिरी केलीय. त्यामुळे विधानसभा निवडणुकीच्या तोंडावर सामान्य शिवसैनिकांमध्ये दोन्ही शिवसेना एकत्र करण्याबाबत भावना निर्माण झाल्या आहेत.

राज ठाकरेंनी शिवसेना सोडल्यानंतर मराठी माणसाच्या बळकटीसाठी उद्धव आणि राज ठाकरेंना एकत्र करण्यासाठी अनेकांनी मोहिमा राबवल्या. मात्र त्याला यश आलं नाही. आता शिंदे आणि ठाकरेंना एकत्र करण्यात तरी यश येणार का? अशी चर्चा हा बॅनर लावल्यानंतर राज्यात रंगलीय.