मुंबई महापालिकेवर सत्ता मिळवण्यासाठी भाजपसह महायुतीतील घटक पक्षांनी कंबर कसलीय. अशातच राज्याच्या राजकीय वर्तुळात खळबळ उडालीय आणि त्याला कारण ठरलंय.. उद्धव ठाकरेंनी पुन्हा शिवतीर्थावर जाऊन राज ठाकरेंची घेतलेली भेट.. ही भेट तब्बल अडीच तास चालली.यावेळी ठाकरे बंधूंमध्ये आगामी महापालिका निवडणुकीची रणनीती ठरल्याची चर्चा आहे.

मनसे आणि ठाकरे गट कोणत्या मुद्द्यांवर निवडणूक लढवणार, तसचं मुंबईतील दोन्ही पक्षाच्या नेत्यांकडे निवडणुकांची जबाबदारी देण्यासंदर्भात निर्णय झाल्याची माहिती सूत्रांनी दिलीय.

उद्धव ठाकरे आणि राज ठाकरेंमध्ये झालेल्या या बैठकीत ठाकरेसेनेकडून संजय राऊत आणि अनिल परब तर मनसेकडून बाळा नांदगावकर हे सहभागी झाले होते. याचं भेटीनंतर युतीबाबत दोन्ही पक्षातील नेत्यांनी सकारात्मक भूमिका मांडली.

दुसरीकडे ठाकरे बंधू आता पटायला लागलं म्हणून एकत्र येतायत असा टोला विरोधकांनी लगावलाय.

मात्र ठाकरे बंधूंची कोणत्या महापालिकामध्ये युती होऊ शकते? पाहूयात..

'या' महापालिकेत होणार ठाकरेंची युती?

मनसे आणि ठाकरेसेनेत मुंबई, ठाणे, कल्याण डोंबिवली, नाशिक, पुणे, पिंपरी चिंचवड, छत्रपती संभाजीनगर आणि नवी मुंबई या महापालिका निवडणुकांसाठी युती होऊ शकते. त्याव्यतिरिक्त इतर महापालिका ठाकरेसेना मविआसोबत आणि मनसे स्वतंत्र निवडणुकीला समोरे जाऊ शकतो.

गणेशोत्सवानंतर उद्धव ठाकरेंनी दुसऱ्यांदा राज ठाकरेंची शिवतीर्थावर भेट घेतलीय. त्यामुळे मुंबई महापालिकेवरील 25 वर्षांची सत्ता टिकवण्यासाठी उद्धव ठाकरेंकडून शर्थीचे प्रयत्न केले जातायत. त्याआधी राज ठाकरेंनीही मुंबई महापालिकेवर ठाकरेंचीच सत्ता यायला हवी असा कानमंत्र पदाधिकाऱ्यांना दिला होता. त्यामुळे महायुतीची कोंडी करण्यासाठी ठाकरे बंधूंनी एकीची वज्रमूठ कायम ठेवली तर राज्यातील महापालिका युतीत महायुती विरुद्ध ठाकरे बंधू अशी रस्सीखेच पाहायला मिळेल.