नागपंचमीच्या पार्श्वभूमीवर तुळजाभवानी मंदिर संस्थानकडून भाविकांसाठी महत्त्वाची सूचना जारी करण्यात आली आहे. नागपंचमीच्या दिवशी सायंकाळी ५ ते ६ या वेळेत पुरुषांना तुळजाभवानी मंदिरात प्रवेश बंद राहणार आहे. पूर्वापार चालत आलेल्या धार्मिक आणि पारंपरिक प्रथेनुसार हा निर्णय घेण्यात आला आहे.

नागपंचमी हा सण महाराष्ट्राच्या ग्रामीण आणि शहरी भागात मोठ्या श्रद्धेने साजरा केला जातो. या दिवशी नागदेवतेचे पूजन करण्याची परंपरा असून, अनेक ठिकाणी महिलांकडून विविध पारंपरिक धार्मिक विधी केले जातात. तुळजाभवानी मंदिरातही नागपंचमीच्या निमित्ताने सुवासिनी महिलांकडून नागपूजनासह फेर-भुलई आणि इतर पारंपरिक कार्यक्रमांचे आयोजन केले जाते. नागपंचमीच्या दिवशी सायंकाळच्या वेळेत महिलांकडून मंदिर परिसरात पारंपरिक पद्धतीने धार्मिक विधी आणि खेळ पार पडतात.

या कार्यक्रमांना पूर्वापार धार्मिक आणि सांस्कृतिक महत्त्व आहे. याच परंपरेनुसार दरवर्षी ठराविक वेळेत पुरुषांच्या मंदिर प्रवेशावर निर्बंध घालण्यात येतात. यंदाही नागपंचमीच्या दिवशी सायंकाळी ५ ते ६ वाजेपर्यंत पुरुष भाविकांना मंदिरात प्रवेश करता येणार नाही. या कालावधीत सुवासिनी महिलांकडून नागपूजन आणि पारंपरिक कार्यक्रम पार पडणार आहेत.

दरम्यान, मंदिर संस्थानच्या या सूचनेची भाविकांनी नोंद घ्यावी आणि मंदिर प्रशासनाला सहकार्य करावे, असे आवाहन करण्यात आले आहे. नागपंचमीच्या निमित्ताने तुळजाभवानी मंदिरात भाविकांची मोठी गर्दी होण्याची शक्यता असल्याने भाविकांनी दर्शनाचे नियोजन करताना या वेळेची विशेष नोंद घेणे आवश्यक आहे. त्यामुळे नागपंचमीच्या दिवशी तुळजाभवानी मंदिरात दर्शनासाठी येणाऱ्या पुरुष भाविकांनी सायंकाळी ५ ते ६ या वेळेत प्रवेशबंदी असणार असल्याचे लक्षात घेऊन आपल्या दर्शनाचे नियोजन करावे.