अन्न व औषध प्रशासनाचे आयुक्त तुकाराम मुंढे यांनी राज्यभरात कारवाईचा धडका लावला आहे. तुकाराम मुंढे यांच्या या धडक कारवाईची धास्ती एवढी आहे की, साहेब तपासणीसाठी येणार असल्याची साधी बातमी कानी आली तरी दुकानदारांना तारे दिसायला लागतात. अशीच काहीशी घटना नांदेडमध्ये घडली आहे.ti

एफडीएचे आयुक्त तुकाराम मुंढे हे आज नांदेड दौऱ्यावर आल्याची अफवा अख्खा शहरभर पसरली. अफवा ऐकूनच शहरातील अनेकांनी पान टपऱ्या धडधड बंद केल्या. तुकाराम मुंढे यांनी पदभार स्वीकारल्यानंतर गुटखा आणि तंबाखूजन्य पदार्थ विकणाऱ्यांवर देखील कारवाया सुरू केल्या. त्याची धास्ती पान टपरी चालकांना आहे. त्यातच आज तुकाराम मुंढे नांदेडला आले असल्याची अफवा नांदेड शहरात पसरली आणि दुपारनंतर शहरातील मुख्य भागातील पान टपऱ्या बंद झाल्या. कारवाईच्या भीतीपोटी अनेकजण टपऱ्या बंद करून टपरी चालक पसार झालेत.

अफवेने मोठ्या बाजारपेठा काही मिनिटांत कुलूपबंद

नांदेडप्रमाणे बुलढाण्यातील मेहकर तालुक्यातही अशीच गत झाली. मेहकर तालुक्यातील सर्वात मोठी बाजारपेठ असलेल्या डोणगावा काहींच्या मोबाईलवर 'एफडीएचे साहेब येणार' असा मेसेज फिरला. सोशल मीडियावरील हा मेसेज व्हायरल होताच संपूर्ण बाजारपेठ काही मिनिटांत बंद झाली.किराणा, मिठाई दुकानांसह पानटपऱ्या आणि हॉटेल्स चालकांनी दुकाने बंद करून पळ काढला. अवैध गुटखा, पानमसाला आणि तंबाखूजन्य पदार्थांची सर्रास विक्री करणाऱ्या टपरी चालकांमध्ये आयुक्त तुकाराम मुंढे यांच्या पथकाची मोठी दहशत निर्माण झालीय.

भीतीपोटी फेकल्या पेप्सी

अकोल्यात तुकाराम मुंढे यांच्या कारवाईच्या भीतीनं अज्ञात दुकानदारांनी हजारो रुपयांच्या पेप्सी रस्त्याच्या बाजुला फेकून दिल्या. अकोलामधील पळसोद फाट्या दरम्यान, हजारो पेप्सी आढळून आल्या. कुणीतरी अज्ञात दुकानदारांनी संपूर्ण पेप्सीचा माल फेकून दिला . आज अकोल्यातल्या चौहट्टा बाजार येथे विविध भागात अन्न व औषध विभागाच्या पथकाकडून विविध ठिकाणी धाडी टाकण्यात येत आहेत.