अहिल्यानगरमध्ये अंगावर काटा आणणारी घटना घडली आहे. रात्री घराच्या अंगणात खेळताना एका चिमुकलीवर शेतात दबा धरून बसलेल्या बिबट्याने हल्ला केला. धक्कदायक म्हणजे अंधाराचा फायदा घेत बिबट्याने चिमुकलीला घेऊन धूम ठोकली. या घटनेने कुटुंबियांवर दुःखाचा डोंगर कोसळला असून गावात भीतीचे वातावरण पसरले आहे.

काही दिवसांपूर्वी एका गावात घराच्या अंगणात खेळणाऱ्या चिमुकल्यावर बिबट्याने हल्ला केल्याची घटना घडली. या घटना ताज्या असतानाच अहिल्यानगरमधील खारे कर्जुने येथे रियांका पवार पाच वर्षीय चिमुकली रात्री घराच्या अंगणात खेळत होती. घराजवळ असलेल्या तुरीच्या शेतात एक बिबट्या दबा धरून बसला होता. संधी साधून हा बिबट्या दबक्या पावलाने पवार यांच्या अंगणात गेला आणि रियांकावर हल्ला केला.

कुटुंबीयांनी हा प्रकार बघताच आरडाओरड केली. मात्र तोपर्यंत बिबट्याने रियांकाला आपले भक्ष बनवून शेतात ओढत नेले. पवार कुटुंबीयांनी त्याचा पाठलागही केला मात्र एखाद्या चोराप्रमाणे अंधाराचा फायदा घेत या बिबट्याने पळ काढला असल्याची माहिती चिमुकलीचे आजोबा रोहिदास गायकवाड आणि तिची आई ताई पवार यांनी दिली आहे. या घटनेमुळे या कुटुंबीयांवर दुःखाचा डोंगर कोसळला असून पोटच्या मुलीला उचलून नेल्यामुळे आईने हंबरडा फोडला आहे. या बिबट्याला तातडीने जेरबंद करण्याची मागणी गावकऱ्यांकडून करण्यात येत आहे.

गेल्या दोन महिन्यांपासून या भागात बिबट्यांचा वावर असून वन विभागाला वारंवार तक्रारी करूनही कोणतीही दखल न घेतल्यामुळे ग्रामस्थ आक्रमक झाले आहेत. या परिसरात जवळपास चार ते पाच बिबट्यांचा वावर असून याची कल्पना वन विभागाला दिली होती. मात्र वनविभागाने इतर ठिकाणी बंद पिंजरे लावले असल्याची माहिती गावकऱ्यांनी दिली आहे. गेल्या बारा तासापासून या परिसरात रियांकाचा शोध सुरू असून अद्यापही चिमुकलीचा शोध लागलेला नाही.