मनोज जैसवाल, वाशीम

समृद्धी महामार्गावरील अपघातांची मालिका सतत सुरु असून समृद्धी महामार्ग हा चालकांसाठी जीवघेणा ठरत आहे. काल वाशिममध्ये समृद्धी महामार्गावर उभ्या असलेल्या ट्रकला मागून येणाऱ्या ट्रकने जोरदार धडक दिल्यानं भीषण अपघात घडला आहे. या दुर्घटनेत दोघांचा जागीच मृत्यू झाला आहे, तर एक जण जखमी झाला आहे. याप्रकरणी पोलीस तपास करत आहेत. तसेच जखमींवर जवळच्या रुग्णालयात उपचार सुरु आहेत.

मिळालेल्या माहितीनुसार, वाशिमच्या कारंजा तालुक्यात समृद्धी महामार्गावर उभ्या असलेल्या ट्रकला मागून येणाऱ्या ट्रकने जोरदार धडक दिल्याने भीषण अपघात झाला. या अपघातात दोघांचा जागीच मृत्यू झाला असून एक जण जखमी झाला आहे.

मृतांपैकी एक जण उत्तर प्रदेशातील जनकपुर येथील आहे,तर दुसरा बुलढाणा जिल्ह्यातील असल्याची प्राथमिक माहिती समोर आली आहे. अपघाताची माहिती मिळताच श्री गुरु मंदिर रुग्णवाहिकेचे रुग्णसेवक रमेश देशमुख यांनी तात्काळ घटनास्थळी जाऊन, शेलुबाजार 108 समृद्धी महामार्ग येथून अपघातात जखमी झालेल्या रुग्णांना घेऊन कारंजा उपजिल्हा रुग्णालयात दाखल केले.

तेथील वैद्यकीय अधिकारी डॉ स्नेहलता चव्हाण यांनी दोन जखमीना मृतक घोषित केले आणि जखमी झालेल्या रुग्णावर कारंजा येथील उपजिल्हा रुग्णालयात प्राथमिक उपचार केले. या घटनेनें परिसरात भीतीचे वातावरण पसरले असून पोलीस या घटनेचा सविस्तर तपास करत आहेत.