- चेतन व्यास

Wardha News : वर्धेच्या कारंजा घाडगे येथील टोलनाका जवळील कँटीनमध्ये विसरलेली दागिन्यांची पर्स सुरक्षित एका कुटुंबास परत मिळाली. टोल नाका कॅन्टीनवरील कामगाराने ही पर्स सुरक्षित ठेवली होती. कामगाराने पोलिसांना पर्स दिल्यानंतर संबंधितास ऐवजासह पर्स परत करण्यात आली. (Maharashtra News)

अमरावती येथून नागपूर येथे घरी जात असताना नागपूर येथील चंद्रकांत आत्राम व त्यांचा परिवार कारंजा टोल नाक्यावर कॅन्टीनमध्ये चहापाणी घेण्याकरिता थांबले. त्यांच्या आईची प्रकृती अस्वस्थ वाटू लागल्याने तात्काळ नागपूर येथे पोहोचण्यासाठी निघाले.

दरम्यान घाईने जाताना त्यांची पत्नी शितल आत्राम यांच्याजवळ सोन्याचा ऐवज असलेली पर्स त्या कँटीनवरच विसरल्या. या कॅन्टीनमध्ये काम करणा-या मनोज साहेबराव नाईक याला ही पर्स दिसली. त्याने पर्स बाबतची माहिती पोलिसांना दिली.

त्यानंतर आत्राम कुटुंबियांना त्यांची पर्स पाेलिसांनी सर्व ऐवजसह सुरक्षित परत केली. यावेळी पाेलिसांनी आणि आत्राम कुटुंबियांनी दागिन्यांना आकर्षित न हाेता मनाेज नाईक यांनी पर्स परत केल्याने त्यांच्या प्रामाणिकपणाचे काैतुक केले.

Edited By : Siddharth Latkar