रणजीत माजगांवकर, कोल्हापूर | साम टीव्ही

महायुती आणि महाविकास आघाडीतील घटकपक्षांमध्ये चर्चेच्या फेऱ्या सुरू आहेत. राज्य पातळीवरील, तसेच स्थानिक पातळीवरील प्रमुख नेत्यांच्या बैठका सुरू आहेत. उमेदवारी अर्ज भरण्याची प्रक्रिया सुरू झाली असली तरी जागावाटप आणि उमेदवारी वाटपावरच घोडं अडलं आहे. त्याचवेळी कोल्हापुरातील राजकीय समीकरणं बदलली आहेत. महायुती आणि महाविकास आघाडीत थेट लढत होणार असल्याचं चित्र सुरुवातीला दिसत होतं, पण यात आता तिसऱ्या आघाडीनं उडी घेतली आहे.

कोल्हापूर महानगरपालिकेच्या निवडणुकीसाठी महायुती आणि महाविकास आघाडीमध्ये थेट लढत होणार असल्याचं चित्र स्पष्ट झालं आहे. त्यात आता तिसऱ्या आघाडीनं उडी घेतल्यानं निवडणुका चुरशीच्या होणार आहेत. कार्यकर्ता पॅटर्न राबवत वंचित बहुजन आघाडी आणि आम आदमी पक्ष एकत्र आले असून, त्यांनी तिसऱ्या आघाडीची घोषणा केली आहे.

कोल्हापूर महानगरपालिकेमध्ये घराणेशाहीला थारा न देता कार्यकर्त्याला न्याय देण्यासाठी ८१ जागांवर उमेदवार देणार असल्याची घोषणा या तिसऱ्या आघाडीकडून करण्यात आली. १६ जानेवारीनंतर महाविकास आघाडीने नेमकं काय गमावलं, हे त्यांना कळेल असा इशारा देखील यावेळी देण्यात आला. शिवाय राष्ट्रवादी काँग्रेस शरदचंद्र पवार पक्ष सोबत आल्यास त्यांचं आम्ही स्वागत करू, असंही तिसऱ्या आघाडीच्या संदीप देसाई आणि अरुण सोनवणे यांनी स्पष्ट केलं.

काँग्रेस उमेदवारांची यादी होणार जाहीर

कोल्हापूर महानगरपालिका निवडणुकीच्या पार्श्वभूमीवर काँग्रेसच्या तीसहून अधिक उमेदवारांच्या नावाची यादी जाहीर होणार आहे. आज रात्रीपर्यंत काँग्रेसकडून तीसहून अधिक उमेदवारांच्या नावांची घोषणा होण्याची शक्यता व्यक्त केली जात आहे. महाविकास आघाडीमध्ये शिवसेनेला दिलेल्या १२ जागा वगळून काँग्रेस पहिल्या टप्प्यातील तीसहून अधिक उमेदवारांची नावे जाहीर करणार असल्याचं सूत्रांकडून सांगण्यात आले आहे. तर महाविकास आघाडीमधील राष्ट्रवादी (शरद पवार गट) वेट अँड वॉचच्या भूमिकेत आहे, अशी माहितीही सूत्रांनी दिली.