बारामती : पुणे-सोलापूर राष्ट्रीय महामार्गावर इंदापूर (indapur) तालुक्यातील वरकुटे बुद्रुक पाटी येथे थरारक घटनेनं खळबळ उडाली आहे. भररस्त्यात गोळीबार करुन चोरट्यांनी (Robbery at pune solapur highway) एका कारला अडवून तब्बल ३ कोटी ६० लाखांची रोकड लंपास केली. ही धक्कादायक घटना आज शुक्रवारी रात्री २.३० वाजताच्या सुमारास घडली. या गंभीर घटनेमुळं परिसरातील नागरिकांमध्ये भीतीचं वातावरण पसरलं आहे. याप्रकरणी गुजरात (Gujrat) येथील मेहेसना जिल्ह्यातील कहोडात राहणारे भावेशकुमार अमृत पटेल यांनी इंदापूर पोलिसांत तक्रार दाखल केली आहे.

मिळालेल्या माहितीनुसार, वरकुटे पाटी गावातील हद्दीत पुणे-सोलापूर राष्ट्रीय महामार्गावर चार अज्ञात चोरट्यांनी गोळीबार करत भररस्त्यात कार अडवली. त्यानंतर चोरट्यांनी कारमधील प्रवाशांना मारहाण केली. त्याच दरम्यान कारमध्ये लपून बसलेल्या दोन चोरट्यांनी कारमध्ये असलेली ३ कोटी ६० लाख रुपयांची रोख रक्कम, तीन मोबाईल फोन लंपास केले. याप्रकरणी इंदापूर पोलिसांत तक्रार दाखल करण्यात आली आहे.

Edited By - Naresh Shende