नाशिक: मालेगाव महापालिकेच्या (Malegoan Muncipal Corporation) उर्दू शाळेत चक्क भाडोत्री शिक्षक विद्यार्थ्यांना शिकवण्याचं काम करत असल्याचा धक्कादायक प्रकार समोर आला आहे. महापालिकेच्या शाळेत कायमस्वरूपी नोकरीवर असणाऱ्या शिक्षकांनी चक्क आपल्या जागेवर भाडोत्री शिक्षकांची नियुक्ती केल्याचं उघड झालं आहे. त्यामुळे शिक्षण खात्याची अब्रू पुरती वेशीवर टांगली गेलीय. मालेगाव महापालिकेच्या उर्दू शाळा क्रमांक 47 मध्ये हे दोन भाडोत्री शिक्षक ज्ञानदान करत असल्याचं महापालिका अधिकाऱ्यांना आढळून आलंय. त्यातील एक महिला मुख्याध्यापकांच्या वर्गावर शिकवत होती. तर दुसरा एक शिक्षक दुसऱ्या वर्गावर ज्ञानदान करत होता.

महापालिकेच्या शिक्षण विभागाच्या कर्मचाऱ्यांनी केलेल्या तपासणीत हा भांडाफोड झाला आहे. मात्र यामुळे विद्यार्थ्यांचे मोठे नुकसान होत असून याची पालकांना सुद्धा माहिती नव्हती. उर्दू शाळेत नोकरीवर कायम स्वरूपी काम करणाऱ्या दोन शिक्षकांनी आपल्या जागी दोन भाडोत्री शिक्षक ठेवले होते. त्यामुळे हे शिक्षक नोकरीवर नसायचे. त्यांच्या जागी हे भाडोत्री शिक्षक शिकवायचे. त्यांना महिन्याकाठी पंधराशे रुपये नोकरीवर कायम असणारे शिक्षक देत होते, असं समोर आलंय.

विशेष म्हणजे यातील एक शिक्षिका चक्क मुख्याध्यापकाच्या वर्गावर शिकवत असल्यानं जर मख्याध्यापक असं करत असतील, तर इतरांचे काय? असा प्रश्न उपस्थित होतोय. हा सर्व प्रकार उघड झाल्यानंतर आता याबाबतचा पंचनामा करून अहवाल आयुक्तांकडे सादर करण्यात आला असून संबंधित शिक्षकांवर कारवाई करण्यात येणार असल्याचं महापालिका उपायुक्तांनी सांगितलंय.