सोमवारी होणाऱ्या रक्षाबंधनासाठी आलेल्या बहिणीला कारमधून गावाकडे घेऊन जात असताना पंढरपूर जवळ भीषण अपघात झाल्याची घटना घडली आहे. यामध्ये मंगळवेढा येथील बहीण भावाचा दुर्दैवी मृत्यू झाला आहे. हा अपघात आज सायंकाळी पंढरपूर जवळच्या गोपाळपूर येथे झाला. तात्या जाधव आणि ऋतुजा जाधव, असं या अपघातातील मृतांची नावे आहेत.

मिळालेल्या माहितीनुसार, तात्या जाधव हा तरूण आपली बहीण ऋतुजा जाधव हिला कारमधून मंगळवेढा येथे घेऊन जात होता. त्याचवेळी बहिण भावावर काळाने घाला घातला.

पंढरपूरहून मंगळवेढाकडे निघालेल्या कारला समोरून येणाऱ्या टेम्पोने जोरदार धडक दिली. यामध्ये कारचा चक्काचूर झाला. यामध्ये बहीण भाऊ जागीच ठार झाले आहेत. या घटनेने सर्वत्र हळहळ व्यक्त केली जात आहे.

अकोल्यात कार पलटी होऊन भीषण अपघात

दरम्यान, अकोल्यात वाहनावरील नियंत्रण सुटल्यामुळ भीषण अपघात झाल्याची घटना शनिवारी घडली होती. भरधाव वेगात जात असलेल्या कार वाहनचालकाचे वाहनावरील नियंत्रण सुटलं आणि कार पलटी होऊन भीषण अपघात झाला. अपघातात जण 1 ठार तर 3 जण गंभीर जखमी झाले होते. जखमींवर अकोल्यातील शासकीय रुग्णालयात उपचार सुरू आहेत.

अकोला जिल्ह्यातून जाणाऱ्या राष्ट्रीय महामार्गावरील मुर्तीजापुर तालुक्यातल्या पैलपाडा गावाजवळ आज शनिवारी सायंकाळी सडे सहा वाजताच्या सुमारास ही घटना घडली. मुर्तीजापुर येथून अकोल्याच्या दिशेने चौघेजण कारने येत असताना वाहन चालकाचे वाहनावरील नियंत्रण सुटलं आणि कार पलटी होऊन हा अपघात झाल्याचे समजते आहे. या भीषण अपघातात एकाचा जागीच मृत्यू तर तिघेजण गंभीर जखमी झाले आहेत.