संजय सूर्यवंशी, नांदेड

तेलंगणा राज्यातील संगारेड्डी जिल्ह्यात मंगळवारी पहाटे राष्ट्रीय महामार्ग क्रमांक 161 वर भीषण अपघात झाला. या अपघातात नांदेडच्या एका कुटुंबातील तिघांचा दुर्दैवी मृत्यू झाला, तर एक जण गंभीर जखमी झाला आहे. या घटनेमुळे नांदेड शहरात हळहळ व्यक्त होत आहे.

नांदेड शहरातील बागबान कॉलनी येथील एक कुटुंब कारने हैदराबादकडे जात होते. संगारेड्डी जिल्ह्यातील बचूपल्ली परिसरात अचानक एक दुचाकी कारसमोर आली. तिला वाचवण्याच्या प्रयत्नात चालकाने अचानक ब्रेक लावला. त्यामुळे कारवरील नियंत्रण सुटून ती अनेक वेळा पलटी झाली. त्यानंतर कार दुभाजकावर आदळून रस्त्याच्या दुसऱ्या बाजूला जाऊन अदळली.

या भीषण अपघातात मौलाना मोहम्मद नदीम, त्यांची आई शमीमा बेगम आणि चार वर्षांची मुलगी अनाबिया तस्कीन यांचा जागीच मृत्यू झाला. तर त्यांचे धाकटे बंधू नविद गंभीर जखमी झाले असून त्यांच्यावर रुग्णालयात उपचार सुरू आहेत.

कारमधील इतर काही जणांना किरकोळ दुखापत झाली आहे. सऊदी अरबियातुन हैदराबाद एयरपोर्ट येथे पोहोचलेल्या आपल्या नातेवाईकांना घेण्यासाठी हे कुटुंब जात होते. मात्र वाटेतच हा दुर्दैवी अपघात झाला. पोलीस या घटनेचा तपास करत आहेत.