Nashik Talathi Exam 2023: नुकत्याच नाशिकमध्ये घेण्यात आलेल्या तलाठी पदाच्या ऑनलाईन परीक्षेत पहिल्याच दिवशी गैरप्रकार झाल्याचे उघडकीस आले आहे. नाशिकमधील म्हसरुळ परिसरातील केंद्राबाहेरून एका तरुणाला पोलिसांनी ताब्यात घेतले होते. ताब्यात घेतलेला तरुण कॉपीचा मास्टर माईंड निघाल्याचे समोर आले आहे.

याबाबत अधिक माहिती अशी की, नाशिक (Nashik) तलाठी भरती परिक्षेतील पेपर फुटी प्रकरणातील आरोपी गणेश गुसिंगे याच्याबाबत मोठी माहिती समोर आली आहे. याच आरोपीने २०१९ मधील म्हाडा भरती आणि २०२१ च्या पिंपरी चिंचवड पोलीस भरतीचाही पेपर फोडल्याचे तपासात निष्पन्न झाले आहे.

धक्कादायक बाब म्हणजे या प्रकरणी त्याच्यावर 2021 साली गुन्हा नोंद करण्यात आला होता. त्यामुळे पोलिसांनी फरार असलेल्या या आरोपीला दोन वर्षे कसे काय अटक केली नाही असा प्रश्न आता विचारण्यात येत आहे. या प्रकरणात त्याच्या आणखी दोन साथिदारांचा समावेश असल्याचेही स्पष्ट झाले आहे.

आरोपी गणेश गुसिंगे हा शासनाच्या विविध भरती प्रक्रियेत गरजू उमेदवारांचा शोध घेवून त्यांना परीक्षेत उत्तीर्ण करण्याचे आमिष दाखवायचा. तसेच त्यांच्याकडून मोठ्या प्रमाणात पैसे घेत असल्याचेही समोर आले आहे. सध्या गुसिंगेच्या दोघा साथीदारांच्या शोधासाठी पोलीस पथके रवाना झाली आहेत. (Latest Marathi News)