बुलडाणा : शेतकऱ्यांना दिवसा विज मिळावी यासाठी गेल्या १० दिवसांपासून राजू शेट्टींच्या (raju shetti) कोल्हापुरातील (kolhapur) आंदोलनाची दखल न घेतल्याने राज्यभरातील स्वाभिमानी शेतकरी संघटना याचे पदाधिकारी आणि कार्यकर्ते आक्रमक झाले आहेत. आज (शुक्रवार) ‘स्वाभिमानी’ चे नेते रविकांत तुपकरांसह (ravikant tupkar) शेकडो शेतक-यांनी (farmers) नागपूर – सोलापूर महामार्ग चिखली जवळ पेठ फाट्यावर अडवून धरला आहे.

जोपर्यंत राजू शेट्टीच्या आंदोलनावर मार्ग निघत नाही तोपर्यंत रस्त्यावरून हटणार नाही अशी आक्रमक भूमिका तूपकरांनी घेतल्याने नागपूर – सोलापूर महामार्गावर मोठ्या प्रमाणात वाहतूक कोंडी झाली आहे.

तुपकर म्हणाले रात्री जंगली जनावरे, साप, विंचू काट्याचा शेतकऱ्यांना सामना करावा लागतो म्हणून दिवसा विज द्या ही ‘स्वाभिमानी’ची मागणी आहे. राज्य सरकारने शेतकऱ्यांची दखल न घेतल्यास राज्यभरातील महावितरणची कार्यालये (mahavitran offices) उध्वस्त करू असा गंभीर इशारा रविकांत तूपकरांनी आंदोलन स्थळावरून दिला आहे.

दरम्यान बारावीच्या विद्यार्थ्यांच्या परीक्षा मार्गात अडथळा होऊ नये म्हणून विद्यार्थ्यांना परीक्षा केंद्रावर जाण्यासाठी आंदोलकांकडून मुभा दिली जात आहे. एकंदरीतच तुपकरांच्या आक्रमक भुमिकेमुळे हे आंदोलन चिघळण्याची शक्यता निर्माण झाली आहे.

Edited By : Siddharth Latkar