आजचा दिवस हा माझ्यासाठी काळा दिवस आहे. आज जे घडल ते इतिहासात कधीही घडल नाही. सभागृहाच्या दालनात विरोधी पक्षातील सदस्यांनी अर्वाच्च भाषेत शिवीगाळ केली. ही बाब अत्यंत लांच्छनास्पद आहे, अशा शब्दांत सभागृहाचे तालिका अध्यक्ष भास्कर जाधव (Bhaskar Jadhav) यांनी संताप व्यक्त केला. राज्याचे विधीमंडळाच्या दोन दिवसीय अधिवेशनाच्या (Monsoon Session) पहिल्या दिवशीच विधानसभेत ओबीसी आरक्षणावरून (OBC Reservation) मोठा गोंधळ झाला. या मुद्द्यावरुन सत्ताधारी व विरोधकांमध्ये विधानसभा अध्यक्षांच्या दालनात धक्काबुक्की झाली. यावरून तालिका अध्यक्षांनी विरोधी पक्षातील नेत्यांचे निलंबन करण्यात आले आहे. (12 BJP MLAs suspended by table president)

यानंतर तालिका अध्यक्षांनी भाजपाच्या 12 आमदारांचे निलंबन केले आहे. यात संजय कुटे, राम सातपुते, अतुल भातखाळकर, अभिमन्यु पवार, जयकुमार रावल, नारायण कुचे, गिरीश महाजन, आशीष शेलार, पराग आळवणी, योगेश सागर, कीर्तीकूमार भांगडिया, हरिष पिंपळे यांचे निलंबन केले आहे. सभागृहाची प्रतिमा खराब केल्याने या आमदारांवर ही करवाई करण्यात आली आहे. पुढील एक वर्षासाठी त्यांचे निलंबन करण्यात आले आहे. मंत्री अनिल परब यांनी निलंबनाचा ठराव मांडला आणि अध्यक्षांनी तो मंजूर केला. इतकेच नव्हे तर भाजपा आमदारांनी अध्यक्षांशी देखील गैरवर्तन केल्यामुळे त्यांच्यावर ही निलंबनाची कारवाई करण्यात आली आहे.

दरम्यान, या गोंधळातच ओबीसी आरक्षणाचा इम्पेरील डेटा केंद्र सरकारकडून मिळावा, याबाबत ठराव मंजूर करण्यात आला. या मुद्द्यावरून सत्ताधारी महाविकास आघाडी आणि विरोधी पक्षात चांगलीच शाब्दिक चकमक झाली. दरम्यान, अशी धक्काबुक्की झाली नसल्याचा दावा विरोधी पक्षनेते देवेंद्र फडणवीस यांनी केला. या गोंधळात तालिका अध्यक्ष भास्कर जाधव यांनी हा ठराव मंजुरीसाठी टाकलयानंतर विरोधकांनी सभागृहात वेलमध्ये येऊन प्रचंड गोंधळ घातला. या गदारोळातच सभागृह अध्यक्षांनी ठराव मंजूर केला. या गोंधळानंतर सभागृहाचे कामकाज दहा मिनिटांसाठी तहकूब करण्यात आलं.

Edited By- Anuradha