काही दिवसांपूर्वी नीट परीक्षेचा निकाल लागला. या परीक्षेत अनेक विद्यार्थ्यांनी घवघवीत यश मिळवले आहे. मेडिकल विषयाचा अभ्यास करण्यासाठी नीट परीक्षा दिली जाते. याच परीक्षेत सोलापुरातील झोपडपट्टीत राहणाऱ्या अल्फीया पठाणने यश मिळवले आहे. अल्फीयाने ७२० पैकी ६१७ गुण मिळवले आहेत.

अल्फीया ही खूप कष्टाळू आणि अभ्यासू मुलगी आहे. तिने आपल्या आईवडिलांसाठी हे मोठे यश संपादन केले आहे. विशेष म्हणजे अल्फियाने कोणत्याही प्रकारचे क्लासेस न लावता सेल्फ स्टडी करुन हे यश संपादित केले आहे. तिला चांगले गुण मिळाल्याने अल्फीयाच्या कुटुंबियांना खूप आनंद झाला आहे. अल्फीयाचे वडिल मुस्तफा पटाण हे भाजी विक्रीचे काम करतात. तर आई समिना ही कपड्याच्या दुकानात कामाला जातात. हे दोघेही अल्प शिक्षित असूनही आपली मुलगी डॉक्टर व्हावी यासाठी त्यांनी खूप कष्ट घेतले आहे. डॉक्टर होण्याच्या पहिल्या टप्प्यात अल्फीयाने उत्तम कामगिरी केली आहे.

याबाबत अल्फीयाने माहिती दिली आहे. मला नीट परीक्षेत ६१७ गुण मिळाले आहे. यासाठी मी माझ्या कुटुंबियाचे, शिक्षकांचे सर्वांचे आभार मानेल. मी १२ पर्यंत कोणताही कोचिंग क्लास लावला नव्हता. म्हणून मला इतरांपेक्षा जास्त मेहनत घ्यावी लागली. मी दिवसभर अभ्यास करायची. त्यामुळेच मी ही परीक्षा पास करु शकली, असं तिने सांगितले.

अतिशय प्रतिकूल परिस्थिती असतानाही अल्फीयाने हे यश मिळवले आहे. प्रचंड इच्छाशक्ती आणि मेहनत करायची ताकद असल्यावर माणूस खूप मोठा होऊ शकतो, हे अल्फीयाने आपल्या कामगिरीतून दाखवले आहे. अल्फीयाचे सर्व स्तरातून कौतुक होत आहे. अल्फीया आता लवकरच वैद्यकीय प्रवेशासाठी अर्ज करणार आहे.