Summary -

• अमरावतीत भीषण अपघातामध्ये सरपंचाचा मृत्यू झाला

• कुऱ्हा–तिवसा रोडवर भरधाव ट्रकने दुचाकीला धडक

• वाढोना गावचे सरपंच प्रशांत हुडे यांचा जागीच मृत्यू

• अपघातामध्ये एक जण गंभीर जखमी झाला आहे

अमरावतीमध्ये भरधाव ट्रकने दुचाकीला चिरडलं. या अपघातामध्ये एकाचा जागीच मृत्यू झाला तर एक जण गंभीर जखमी झाला आहे. अमरावती जिल्ह्यातील कुऱ्हा- तिवसा रोडवर हा भीषण अपघात झाला. या अपघातामध्ये ज्या व्यक्तीचा मृत्यू झाला ते सरपंच होते. अपघात इतका भीषण होता की दुचाकीचा चुराडा झाला. दुचाकीला धडक दिल्यानंतर ट्रक चालक फरार झाला. या अपघाताचा तपास पोलिस करत आहेत.

मिळालेल्या माहितीनुसार, अमरावती जिल्ह्यातील कुऱ्हा- तिवसा रोडवर दुपारच्या सुमारास भीषण अपघात झाला. मालवाहतूक करणाऱ्या ट्रकने दुचाकीला जोरदार धडक दिली. या अपघातात दुचाकीवरून जाणारे दोघे जण रस्त्यावर फेकले गेले. दोघांच्याही डोक्याला गंभीर दुखापत झाली. जास्त रक्तस्राव झाल्यामुळे एकाने जागेवरच प्राण सोडले. मृत्यू झालेल्या व्यक्तीचे नाव प्रशांत हुडे असून ते वाढोना गावचे सरपंच होते.

प्रशांत हुडे धामणगाव रेल्वे तालुक्यातील वाढोना गावचे सरपंच होते. तसंच ते धामणगावातील कृषी उत्पन्न बाजार समितीचे संचालक देखील होते. या अपघाताची माहिती मिळताच पोलिसांनी घटनास्थळी धाव घेतली. जखमी झालेल्या एकाला तात्काळ रुग्णालयात उपचारासाठी दाखल करण्यात आले. तर मृत्यू झालेल्या प्रशांत हुडे यांचा मृतदेह शवविच्छेदनासाठी रुग्णालयात पाठवण्यात आला. प्रशांत हुडे यांच्या मृत्यूमुळे हळहळ व्यक्त केली जात आहे. त्यांच्या वाढोना गावावर शोककळा पसरली आहे. या अपघाताचा तपास सध्या पोलिस करत आहेत. फरार ट्रकचालकाचा शोध घेतला जात आहे.