पराग ढोबळे, नागपूर प्रतिनिधी

Nagpur Latest News : नागपूरमध्ये नीट परीक्षेची तयारी करणाऱ्या दोन विद्यार्थ्यांनी आत्महत्या केल्याची धक्कादायक घटना समोर आली आहे. दोन्ही घटना वेगवेगळ्या ठिकाणी घडल्या, पण एकाच दिवशी घडल्यामुळे नागपूरमध्ये खळबळ उडाली आहे. हिंगणा आणि अंबाझरी पोलिस ठाण्याच्या हद्दीमध्ये दोन जणांनी आयुष्याचा दोर कापला. १७ वर्षीय वैदेही आणि १६ वर्षाच्या ख्वाहिश यांनी आयुष्याचा दोर कापला. नीट परीक्षेत पास न झाल्याचा दबाव असल्यामुळे दोघांनी आयुष्य संपवल्याचे प्राथमिक माहितीमधून समोर आलेय.

१७ वर्षाच्या वैदेहीने आयुष्याचा दोर कापला -

हिंगणा पोलीस स्टेशनच्या हद्दीतील घटना वानाडोंगरी येथील मंगलमूर्ती कॉलनीमध्ये १७ वर्षीय वैदेही अनिल उईके हिने आयुष्याचा दोर कापला. गेल्या वर्षभरापासून ती नीटची तयारी करत होती. तिचे वडील शहर पोलिसांत कार्यरत आहेत. तर मोठी बहीण एमबीबीएसचे शिक्षण घेत आहे. वैदेहीने यावर्षी नीट परीक्षेला बसली होती. पण, कमी गुण मिळाल्यामुळे ती पुन: परीक्षेसाठी तयारी करत होती. सोमवारी संध्याकाळी ७ वाजता वैदेही कोचिंग क्लासमधून घरी आली. तिच्या कुटुंबातील सदस्य बाहेर गेले होते. यावेळी तिने गळफास घेत आत्महत्या केली..

ख्वाहिशने हॉस्टेलमध्ये आयुष्य संपवलं -

अंबाझरी पोलीस स्टेशनच्या हद्दीतील रामनगरमधील हिलटॉप येथील एका वसतिगृहात घडली. ख्वाहिश देवराव नागरे १६, देवटोला, बालाघाट असे मृतकाचे नाव आहे. ख्वाहिश नीटची तयारी करीत होता. तो हिलटॉप ले-आउट येथील एका कोचिंग क्लासमध्ये कोचिंग घेत होता. त्याचे कुटुंब बालाघाट येथे राहते. त्याने एक सुसाइड नोट लिहिली होती. त्यात 'माफ करा आई आणि बाबा, मी हे करू शकत नाही. गेल्या दीड आठवड्यापासून मला वाटत होते की, मी हे करू शकणार नाही. माफ करा. मला सर्व काही वेळेवर दिल्याबद्दल धन्यवाद अश्या पद्धतीची चिठ्ठी लिहून आत्महत्या केली.