Solapur News: सध्या टोमॅटोचे भाव गगनाला भिडले आहेत. त्यामुळे टोमॅटो उत्पादक शेतकऱ्यांची चांगलीच चांदी झाली आहे. अनेक शेतकरी टोमॅटोच्या उत्पादनातून मालामाल झाले असून काही गावात बॅनरही झळकले होते. मात्र एका शेतकऱ्याने टोमॅटोच्या वाढत्या दरामुळे प्रसिद्धीसाठी केलेला खटाटोप त्याच्या चांगलाच अंगलट आला आहे. काय आहे हे संपूर्ण प्रकरण, जाणून घेवूया सविस्तर...

सध्या टोमॅटोचे भाव गगनाला भिडले आहेत. त्यामुळे शेतकरी चांगलेच मालामाल झाले आहेत. अनेक ठिकाणी टोमॅटो चोरीच्या घटनाही घडल्या. असाच प्रकार सोलापूरमधूनही (Solapur) समोर आला आहे. टोमॅटोमुळे आपले नाव प्रसिद्ध व्हावे, अशी अपेक्षा त्या शेतकऱ्याची होती. त्यासाठी उत्तर सोलापूर तालुक्यातील पडसाळी गावात एका शेतकऱ्याने त्याच्या शेतातील टोमॅटो चोरीची अफवा पसरवली.

शेतातील टोमॅटो चोरीस गेला आहे. ही अफवा संपूर्ण तालुक्यात वाऱ्यासारखी पसरली. काही सजग नागरिकांनी तालुका पोलीस ठाण्याला माहिती दिली. संपूर्ण सोलापूर जिल्ह्यात टोमॅटो चोरीची माहिती पसरली. सोलापूर ग्रामीण पोलिसांनी जातीने दखल घेत चोरीचा तपास केला. त्यामध्ये भलताच प्रकार समोर आला.

नागरिकांकडून टोमॅटो चोरीची बातमी समजल्यानंतर पोलीस थेट टोमॅटोच्या शेतात पोहोचले. जमलेल्या अनेक शेतकऱ्यांसह शेतात कोनाकोपरा धुंडाळल्यानंतर पोलीस अधिकाऱ्यांना संशय आला. त्यानंतर चोरीच झाली नाही या निष्कर्षावर पोलीस पोहोचले. हा संपूर्ण प्रकार प्रसिद्धीसाठी केल्याचे उघडकीस आले. दरम्यान, शेतकऱ्याला पोलिसांनी समज देऊन सोडल आहे. (Latest Marathi News)