सोलापूर : शेतातून काढणी केलेल्या सोयाबीनची विक्री केल्यानंतर संबंधित शेतकऱ्याला सोयाबीनच्या बिलापोटी चार लाख रुपयांचा चेक मिळाला होता. हा चेक बँक खात्यात टाकण्यासाठी शेतकरी गेल्यानंतर सदरचा चेक बँकेत भरल्यानंतर चोरीला गेल्याचा धक्कादायक प्रकार समोर आला आहे. विशेष म्हणजे बँकेतून चोरी झालेला चार लाखाचा चेक संबंधित चोराने वटवला आहे. 

सोलापुरात बँक ऑफ महाराष्ट्र या राष्ट्रीयकृत बँकेचा भोंगळ कारभार समोर आला आहे. तर मूळचे बार्शीतील असलेल्या उत्तम दत्तात्रय जाधव या शेतकऱ्यासमोर नवे संकट उभे राहिले आहे. उत्तम जाधव या शेतकऱ्याने सोयाबीन विक्री केल्यानंतर शेतकऱ्याच्या नावाचा तब्बल ४ लाख रुपयांचा चेक बँकेत जमा केला. यानंतर हा चेक त्याच्याच खात्यावर जमा होणे अपेक्षित असताना अनोळखी माणसाच्या नावावर जमा झाल्याचा प्रकार घडला आहे. 

बँकेत चेक भरला नसल्याचा कांगावा 

हा प्रकार लक्षात आल्यानंतर बँकेकडून उडवाउडवी करण्यात आली. यात सुरुवातीला संबंधित शेतकऱ्याने बँकेत चेक भरला नसल्याचा कांगावा बँकेकडून केला गेला. मात्र सीसीटीव्ही फुटेज समोर आल्यानंतर बँकेने चूक मान्य केली. मात्र सोलापुरातील बँक ऑफ महाराष्ट्र बँकेकडून शेतकऱ्याला पैसे देण्यासाठी टाळाटाळ केली जात आहे. यामुळे शेतकरी संतप्त झाला आहे. 

शेतकऱ्याची पोलिसात तक्रार 

गेल्या सात ते आठ दिवसापासून संबंधित राष्ट्रीयकृत बँकेच्या अधिकाऱ्यांची शेतकऱ्याला टोलवाटोलवी सुरु आहे. यामुळे सोयाबीन उत्पादक शेतकरी उत्तम जाधव यांनी यासंदर्भात पोलिसांकडे तक्रार केली आहे. तर दुसरीकडे बँकेच्या अधिकाऱ्यांकडून मात्र चौकशी सुरू असल्याचं कारण देत शेतकऱ्याला हेलपाटे मारायला लावत आहेत. यामुळे या शेतकऱ्याला नाहक त्रास सहन करावा लागत आहे.