महाराष्ट्र बँकेच्या भोंगळ कारभार समोर आलाय. सोलापूरमधील शेतकऱ्याचे सोयाबीनचे बिल म्हणून मिळालेला चेक बँकेतून गहाळ झाल्याचा आरोप शेतकऱ्याने केलाय. सोयाबीन बिल म्हणून आलेला चेक शेतकऱ्याच्या नावावर पैसे जमा न होता तिसऱ्याच व्यक्तीच्या खात्यावर पैसे जमा झाल्याचा पीडित शेतकऱ्याने केलाय.

उत्तम दत्तात्रय जाधव असं या पीडित शेतकऱ्याचे नाव आहे. ते बार्शीतील रहिवाशी आहेत. उत्तम जाधव यांनी सोलापुरातील एका कंपनीला सोयाबीन विकलं होतं, त्याबदल्यात कंपनीने चार लाख रुपयांचा चेक जाधव यांना दिला. शेतकरी उत्तम जाधव यांनी हा चेक सोलापुरातल्या नवी पेठ येथील बँक ऑफ महाराष्ट्रच्या शाखेत जमा केला.

मात्र पैसे खात्यावर जमा का झाले नाही याची माहिती घ्यायला गेल्यानंतर चेक बँकेत आढळून आला नाही. याबाबत बँक अधिकाऱ्यांना विचारणा केल्यानंतर उत्तम जाधव यांच्या पायाखालची जमिनी सरकली. कारण त्यांच्या नावाने जमा करण्यात आलेल्या चेक तिसऱ्याच व्यक्तीच्या नावाने वटवण्यात आला.

त्याच्या खात्यावर पैस गेल्याची माहिती बँक अधिकाऱ्याने दिली, असं पीडित शेतकरी उत्तम जाधव यांनी दिली. विशेष म्हणजे हे पैसे परत मिळवण्यासाठी पीडित शेतकरी मागील सात ते आठ दिवसापासून बँक ऑफ महाराष्ट्रच्या खेटा मारत आहेत. मात्र बँकेकडून या संदर्भात कोणतीही दखल घेतली जातं नाहीये. या संदर्भात साम टीव्हीने बँकेच्या अधिकाऱ्यांशी संपर्क साधत त्यांची प्रतिक्रिया जाणून घेण्याचा प्रयत्न केला मात्र बँक अधिकाऱ्यांनी या संदर्भात कोणतीही प्रतिक्रिया देण्यास नकार दिलाय.

सोलापूर एमआयडीसीमधील एका फूड कंपनीला सोयाबीन विकला. त्यांनी मला ३.९३ लाख रुपायंचा चेक दिला. हा चेक मी नवी पेठ येथील महाराष्ट्र बँकेच्या शाखेत जमा केला. त्याची पोच पावती देखील मला बँकेने दिली. परंतु या चेकचे पैसे माझ्या खात्यावर जमा झाले नाहीत. याची विचारणा केली तर चेक बँकेत गहाळ झाला असं बँक अधिकारी सांगत आहेत. मजुरांचे मजुरी देण्यास आणि मुलाच्या लग्नासाठी आता पैसे नाहीत, असं शेतकरी उत्तम जाधव यांनी माध्यमांशी बोलताना सांगितलं.