सोलापूर : उत्तर सोलापूर तालुक्यातील वडाळा या ठिकाणी दवाखाना आणि पेट्रोलपंप असणाऱ्या डॉ.अनिल कुलकर्णी यांचे अपहरण करून 5 लाख 88 हजार 420 रुपयांना लुटून 1 कोटींची खंडणी मागणाऱ्या 7 आरोपींना अटक करण्यात सोलापूर ग्रामीण पोलिसांना यश आले आहे. या कारवाईमध्ये 2 लाख 50 हजार रोख रकमेसह 8 लाख 13 हजार 500 रुपयांचा मुद्देमाल जप्त करण्यात आला आहे.

हे देखील पहा-

उत्तर सोलापूर तालुक्यातील वडाळा येथे प्रॅक्टिस करणारे नामांकित डॉ.अनिल कुलकर्णी हे 21 सप्टेंबर दिवशी रात्री 8.30 वाजता आपल्या वडाळा येथील पेट्रोल पंपाची कॅश घेऊन MH13- BN 9367 या चारचाकी गाडीने सोलापुर शहराकडे जात असताना बीबी दारफळ या ठिकाणी त्यांच्या गाडीला इनोव्हा कार MH42- N 4554 आडवी लावून डॉ.कुलकर्णी यांना गावठी रिव्हॉल्वर लावून त्यांना मारहाण करत या टोळीने त्यांचे अपहरण केले होते. आरोपींनी डॉ.कुलकर्णी जवळील 5 लाख 88 हजार 420 रुपये काढून घेऊन त्यांच्याकडे 1 कोटींची खंडणी मागितली होती.

तसेच त्यांना मोहोळ, पंढरपूर, टेंभुर्णी, इंदापूर, बारामती, जेजुरी- सासवड मार्गे नेऊन वारजे- मळेवाडी पुणे या ठिकाणी ढकलून देऊन निघून गेले होते. या प्रकरणी दाखल गुन्ह्यातील तपास करत असताना हा गुन्हा वडगाव, सिंहगडरोड, पानमळा पुणे येथील आरोपींनी केल्याची गुप्त बातमीदारामार्फत माहिती मिळाली होती. या प्रकरणी 5 आरोपींना पुण्यातून ताब्यात घेऊन चौकशी केली असता हा गुन्हा उघड झाला आहे.

Edited By- Digambar Jadhav