सोलापूर शहरातील शासकीय सिव्हिल हॉस्पिटलमध्ये प्रशासनाच्या गलथान कारभाराचा संतापजनक प्रकार समोर आला आहे. शवविच्छेदनासाठी मृतदेह स्ट्रेचरवरून नेत असताना अचानक स्ट्रेचर तुटल्याने नातेवाईकांना मृतदेह हातात घेऊन पुढे जावे लागल्याची धक्कादायक घटना घडली.

मिळालेल्या माहितीनुसार, आकाश जगदीश कोळी (वय 24) हा तरुण भीमा नदीत पोहण्यासाठी गेला असताना बुडून त्याचा दुर्दैवी मृत्यू झाला. त्यानंतर मृतदेह शवविच्छेदनासाठी सोलापूरच्या सिव्हिल हॉस्पिटलमध्ये आणण्यात आला होता. मात्र मृतदेह स्ट्रेचरवरून शवविच्छेदन कक्षाकडे नेत असताना अचानक स्ट्रेचर तुटले. त्यामुळे उपस्थित नातेवाईकांवर मृतदेह हातात घेऊन पुढे नेण्याची वेळ आली. या प्रकारामुळे रुग्णालयातील व्यवस्थेवर गंभीर प्रश्नचिन्ह उपस्थित झाले आहे.

विशेष म्हणजे मृत आकाश कोळी हा तरुण स्वतः याच शासकीय रुग्णालयात कंत्राटी सफाई कर्मचारी म्हणून काम करत होता. त्यामुळे या घटनेबद्दल नातेवाईकांनी संताप व्यक्त केला असून काही काळ रुग्णालय परिसरात तणावाचे वातावरण निर्माण झाले. दरम्यान अशा प्रकारच्या घटना पुन्हा घडू नयेत यासाठी रुग्णालय प्रशासनाने तात्काळ व्यवस्था सुधारावी अशी मागणी सोलापूरकरांकडून करण्यात येत आहे.