सोलापूर : करमाळा तालुक्यातील देवळाली गावातून मोहोळ येथे वन विभागाची गायरान जमीन मागण्याच्या कामासाठी काही नागरिक छोट्या हत्तीने आले होते. तेथून परतत असताना त्यांच्या गाडीला भीषण अपघात झाला आहे. मागून भरधाव वेगाने आलेल्या ट्रकने जोरदार धडक दिली. यात एका जणाचा जागीच मृत्यू झाला आहे. तर १५ जण जखमी झाल्याची घटना घडली आहे.   

सोलापूर- पुणे महामार्गावर ट्रकने टेम्पोला जोरदार धडक दिल्याने हा अपघात घडला आहे. मोहोळ तालुक्यातील हिरवे फाट्या जवळ घटना घडली असून करमाळा तालुक्यातील विक्रम काळे असे अपघातात मृत झालेल्या व्यक्तीचे नाव आहे. दरम्यान मोहोळ गावातून काही नागरिक हे वन विभागाकडे गायरान जमीन मागण्याच्या कामासाठी निघाले होते. हिरवे फाटा येथे वळून वनविभागाच्या कार्यालयाकडे जात असताना मोहोळ कडून येणाऱ्या भरधाव मालवाहू ट्रक छोट्या हत्तीला मागून जोरदार धडक दिली.

ट्रक चालकाविरुद्ध गुन्हा दाखल 
ट्रकने दिलेल्या धडकेत छोट्या हत्ती गाडीने मोठं नुकसान झाले असून अपघातात एकाचा मृत्यू झाला. तर १५ जखमी झाले असून जखमींपैकी एकाची प्रकृती गंभीर आहे. जखमींवर मोहोळ येथील खाजगी रुग्णालयात उपचार सुरू आहेत. किरण विक्रम काळे यांनी मोहोळ पोलीस ठाण्यात फिर्याद दिली असून मध्य प्रदेश येथील ट्रकचालक गुजेश्वरसिंह कौशल सिंग झाकलवार याच्या विरोधात गुन्हा दाखल करण्यात आला आहे. 

भरधाव कारची ऑटोला धडक, १२ जण जखमी
अकोला : भरधाव चारचाकी वाहनाने एका ऑटोला धडक दिली. या अपघातात ऑटो रिक्षा आणि वाहनामधील तब्बल १२ जण जखमी झाले आहे. अकोल्यातल्या मूर्तिजापूर शहरातील काळा पाणी जिना समोर ही घटना घडली आहे. अपघातानंतर वाहन चालक घटना स्थळावरून फरार झाला होता. दैव बलवत्तर म्हणून सुदैवाने मोठी दुर्घटना टळली आहे. भरधाव वेगाने निष्काळजीपणे वाहन चालवून समोरून पायी येत असलेल्या दोघांना धडक देत येणाऱ्या ऑटोला देखील जबर धडक दिली. पादाचारीसह १२ जण जखमी झाले आहे.