विजय पाटील, साम टीव्ही

सांगली: चित्रपटामधील शोले स्टाईलने प्रेमाची कबुली देण्याच्या घटना आपण अनेकदा ऐकल्या किंवा पाहिल्या असतील. असाच एक सिनेमटीक ड्रामा सांगलीतील कुपवाड शहरात घडला आहे. एकतर्फी प्रेमातून एका तरुणाने थेट मोबाईल टॉवरवर चढून प्रेयसीच्या होकारासाठी ठिय्या मांडल्याची धक्कादायक आणि तितकीच चर्चेची घटना समोर आली आहे.

कुपवाड शहरात अचानक एका मोबाईल टॉवरवरून एका तरुणाच्या जोरजोरात ओरडण्याचा आवाज येऊ लागला. आसपासच्या नागरिकांनी वर पाहिले असता एक तरुण टॉवरच्या टोकावर जाऊन बसल्याचे निदर्शनास आले. “जोपर्यंत माझी प्रेयसी येत नाही आणि प्रेमाचा होकार देत नाही, तोपर्यंत मी खाली उतरणार नाही,” अशी भूमिका या प्रेमवीराने घेतली होती.

एकतर्फी प्रेमातून एका प्रियकराने थेट मोबाईल टॉवरवर चढवून प्रेमाच्या होकारासाठी शोले स्टाईल प्रकार केल्याचं प्रकार घडला आहे. सांगलीच्या कुपवाडमध्ये हा सिने स्टाईल शोले प्रकार घडला. मुलीचा होकार मिळवण्यासाठी प्रेम वेड्या तरुणाने शहरातल्या एका मोबाईल टॉवरवर चढला. त्यानंतर टॉवरवर चढून जोरजोराने ओरडण्याचा प्रकार सुरू झाल्यानंतर आसपासच्या नागरिकांच्या सदर बाब लक्षात आली आणि त्यांनी या घटनेची माहिती पोलिसांना दिली.

जोपर्यंत प्रेयसी येत नाही, तोपर्यंत खाली उतरणार नाही, अशी भूमिका घेत सुमारे तासभर हा प्रेमवीर टॉवरवर बसून होता. या प्रकारामुळे या ठिकाणी बघ्यांची देखील मोठी गर्दी झाली होती. दरम्यान कुपवाड एमआयडीसी पोलिसांनी तरुणाशी संवाद साधत त्याची समजूत काढली. त्यानंतर तरुण खाली उतरला आणि पोलिसांनी या तरुणाला ताब्यात घेतले. मात्र प्रेमवीराच्या शोले स्टाईल प्रकाराने प्रशासनाची चांगलीचं तारांबळ उडाली होती.