फय्याज शेख, शहापूर

भोळ्याभाबड्या आईला शिक्षक असल्याच्या भूलथापा देऊन तिच्या १३ वर्षीय मुलीवर एका अनोळखी व्यक्तीनं लैंगिक अत्याचार केले. मी वालशेत शाळेवर शिक्षक आहे. मुलीला शाळेत नेतो, गणवेश, आधारकार्ड देतो, तसेच दोन हजार रुपये मिळतील असं प्रलोभन आरोपी कथित शिक्षकानं मुलीच्या आईला दिलं होतं.

पीडित मुलगी ही वालशेत येथील आदिवासी पाड्यावरील राहणारी आहे. मी शिक्षक आहे. तुमच्या मुलीला शाळेत घेऊन जातो. आधारकार्ड आणि दोन हजार रुपये देखील मिळतील, असे प्रलोभन आरोपी शिक्षकानं मुलीच्या आईला दाखवलं. त्यानंतर त्यानं तिला दुचाकीवरून पडघा पोलीस ठाण्याच्या हद्दीत निर्जनस्थळी नेलं. तिथं तिच्यावर लैंगिक अत्याचार केले. ही घटना उघडकीस आल्यानंतर शहापूर पोलीस ठाण्यात अनोळखी व्यक्तीविरोधात पोक्सो कायद्यांतर्गत गुन्हा नोंदवण्यात आला आहे. आरोपीचा शोध सुरू आहे.

मोलमजुरी करणाऱ्या कुटुंबावर आघात

शहापूर तालुक्यातील वालशेत ग्रामपंचायत हद्दीतील एका पाड्यावर दुचाकीवरून एक अनोळखी व्यक्ती आली. मी वालशेत शाळेत शिक्षक आहे त्याने सांगितले. तुमच्या मुलीला शाळेत घेऊन जातो, गणवेश देतो, आधारकार्ड देतो आणि तुम्हाला दोन हजार रुपये मिळतील असं प्रलोभनही त्यानं पीडित मुलीच्या आईला दाखवलं.

शिक्षक आहेत, मग आईनेही विश्वास ठेवला. मुलीला घेऊन जा आणि घरी परत सोडा असं आईनं सांगितलं. त्यानंतर आरोपी पीडित मुलीला पडघा पोलीस ठाण्याच्या हद्दीत कांदळी येथे घेऊन गेला. एका निर्जनस्थळी नेलं. तिथं तिच्यावर अत्याचार केले. मुलगी बराच वेळ घरी आली नाही म्हणून शोध सुरू केला. तोपर्यंत पीडित मुलगी एका दुकानापर्यंत पोहोचली. तिथून फोनवरून घरच्यांशी संपर्क साधला. मुलीची आई शहापूर पोलीस ठाण्यात पोहोचली. तिच्या तक्रारीवरून शहापूर पोलीस ठाण्यात आरोपीविरोधात गुन्हा नोंदवला आहे. या घटनेचा तपास सुरू आहे, अशी माहिती पोलीस उपअधीक्षक मिलिंद शिंदे यांनी दिली.