नाशिकमधून धक्कादायक बातमी समोर आली आहे. शहर पोलिस दलातून बडतर्फ केलेल्या पोलिस कर्मचाऱ्याचा संशयास्पद मृत्यू झाला आहे. या कर्मचाऱ्याचा मृतदेह एका बंद खोलीत सापडला. त्यामुळे खळबळ उडाली आहे. रफान मन्सूर शेख असे मृत पोलिस कर्मचाऱ्याचे नाव आहे. याप्रकरणी मृत रफान यांचा मृतदेह शवविच्छेदनासाठी पाठवण्यात आला असून पोलीस सविस्तर तपास करत आहेत.

मिळालेल्या माहितीनुसार, रफान शेख यांना सराईत गुन्हेगारांसह अमली पदार्थ बाळगणाऱ्यांच्या संपर्कात असल्याने सात महिन्यांपूर्वी नाशिक शहर पोलिस दलातून बडतर्फ करण्यात आले होते. त्यानंतरशनिवारी ३१ जानेवारी २०२६ रोजी सायंकाळी उशिरा रफान शेख परराज्यातून नाशिकमध्ये परतले.

रात्री उशिरा भद्रकाली पोलिसांच्या हद्दीत असलेल्या एका लॉजमधील खोलीत पोलीस कर्मचारी रफान मन्सूर शेख यांचा मृतदेह आढळला. या घटनेची माहिती मिळताच पोलीस घटनास्थळी दाखल झाले. घटनेचा पंचनामा केला आणि रविवारी १ फेब्रुवारी रोजी मृतदेह शवविच्छेदनासाठी पाठवण्यात आला. त्यावेळी इरफानच्या मृत्यूचे कारण स्पष्ट होत नसल्याने 'व्हिसेरा' राखून ठेवण्यात आला.

अतिनशेत हृदयविकाराचा झटका आल्याने मृत्यू झाल्याचा प्राथमिक अंदाज पोलिसांनी वर्तवला आहे. भद्रकाली पोलिसांनी या प्रकरणात अकस्मीत मृत्यूची नोंद केली असून तपास सुरू केला आहे. रफान यांच्या पश्चात वडील, पत्नी व दोन मुलं असा परिवार आहे. त्यांचे वडील नाशिक पोलिस दलातून निवृत्त झालेले असून, त्यांचे सख्खे व चुलतभाऊ शहर पोलिस दलात कार्यरत आहेत. दरम्यान हा मृत्यू नशेच्या ओव्हर डोसमुळे हृदयविकाराने झाला की त्यांची हत्या करण्यात आली हे गूढ अद्यापही कायम आहे.