संजय राठोड, साम टीव्ही

यवतमाळ : मुंबईत शाळकरी मुलीवर अत्यचाराची घटना ताजीच असताना यवतमाळमध्येही गुरू-शिष्य नात्याला काळिमा फासणारी घटना घडली आहे. जिल्हा परिषद शाळेतील एका मुख्याध्यापकाने अल्पवयीन विद्यार्थिनीवर लैंगिक अत्याचार केल्याची घटना उघडकीस आली आहे. या प्रकरणी पोलिसांत गुन्हा दाखल करण्यात आला आहे. अत्याचाराच्या घटनेने संपूर्ण शाळेत खळबळ माजली आहे.

शिक्षण क्षेत्राला काळिमा फासणाऱ्या घटनेने समाजमन सुन्न झाले आहे. पीडित विद्यार्थिनीला आमिष दाखवून मुख्याध्यापकाने गैरकृत्य केल्याचं प्रकरण समोर आलंय. या प्रकरणी पोलीस ठाण्यात तक्रार दाखल करण्यात आली आहे. अत्याचाराच्या घटनेने पोलिसांनी तपासाचे चक्र फिरवत आरोपी मुख्याध्यापकाला नागपूर येथे टीईटी परीक्षेसाठी गेल्याची माहिती मिळाली. त्यानंतर पोलिसांनी तात्काळ एक पथक त्याच्या मागावर ठेवले.

टीईटी परीक्षा आटोपून आरोपी मुख्याध्यापक यवतमाळमध्ये घरी परतला. त्यानंतर पोलिसांनी आरोपी मुख्याध्यापकाला ताब्यात घेतलं आहे. त्यानंतर संबंधित मुख्याध्यापकावर गंभीर स्वरूपाचे गुन्हे दाखल करण्यात आले आहेत. या प्रकरणाचा पुढील तपास पोलिसांकडून सुरू आहे. या संपूर्ण प्रकरणाचा तपास पोलीस निरीक्षक केशव ठाकरे यांच्या मार्गदर्शनाखाली सुरू असल्याची माहिती मिळत आहे.

शिक्षण क्षेत्राला काळिमा फासणाऱ्या घटनेने शिक्षकांसारख्या सन्माननीय पेशावर प्रश्नचिन्ह निर्माण झाले आहे. या प्रकारामुळे पालकांमध्ये तीव्र संताप व्यक्त केला जात आहे. दोषीवर कठोरात कठोर कारवाई करावी, अशी मागणी नागरिकांतून होत आहे.

तत्पूर्वी, मुंबईतील मालाडमधील एका शाळेत शिपायाने शाळकरी मुलीवर अत्याचार केल्याची घटना घडली आहे. या प्रकरणी ३५ वर्षीय शिपायासह शाळेच्या मुख्य कार्यकारी अधिकाऱ्यालाही अटक करण्यात आली आहे. शाळेच्या मुख्य कार्यकारी अधिकाऱ्याने पीडित मुलीच्या पालकांना दमदाटी केल्याचाही आरोप आहे.