अक्षय गवळी, साम टीव्ही

अकोल्यातील राजकारणातून मोठी बातमी हाती आली आहे. पोलिसांनी बनावट नोटा प्रकरणात शिंदे गटाच्या नेत्याला ताब्यात घेल्याने राजकीय वर्तुळात एकच खळबळ उडाली. ऐन निवडणुकीच्या निकालाच्या दिवशी त्यांना चौकशीसाठी ताब्यात घेतलं होतं. या चौकशीनंतर वेळोवेळी हजर राहण्याचेही आदेश दिले आहेत.

मालेगावात ऑक्टोबर महिन्यात 10 लाखांच्या बनावट नोटा चलनात आणण्याचा प्रयत्न झाला होता. बनावट नोटा चलनात आणणरे तरुण मालेगाव पोलिसांना रंगेहाथ सापडले होते. या प्रकरणात शिंदे गटाचे नेते दांदळे यांचं कनेक्शन समोर आलं होतं. दीपक पाटील दांदळे हे अकोल्यातील मूर्तिजापुरातील तालुका प्रमुख आहेत. याच दांदळे यांना नाशिकच्या स्थानिक गुन्हे शाखेच्या पोलिसांनी रविवारी चौकशीसाठी ताब्यात घेतलं.

दांदळे चौकशीच्या फेऱ्यात कसे अडकले?

मागील दोन दिवसांच्या चौकशीत बनावट नोटा चलनात आणण्यात राज्याबाहेरील आणि अमरावती जिल्ह्यातील धारणीतील युवकाचाही हात असल्याचं समोर आलं. धारणीतील या संशयित युवकाच्या कॉल सीडीआरमध्ये मूर्तिजापूरातील शिंदे शिवसेनेचे तालुका प्रमुख दीपक पाटील दांदळे यांचा मोबाइल नंबर सापडला. त्यानंतर रविवारी नाशिकच्या स्थानिक गुन्हे शाखा पोलिसांनी त्यांना ताब्यात घेतलं. त्यांची रविवारच्या दिवशी चौकशी झाली.

ऐन नगरपरिषदेच्या निकालाच्या दिवशी पोलिसांकडून दांदळे यांची चौकशी सुरू होती. या चौकशीनंतर दांदळे यांना नोटीस बजावून तपासकामी वेळोवेळी हजर राहण्याचे आदेश बजावले आहेत. नाशिकच्या पोलिसांनी शिंदेसेनेच्या तालुका प्रमुखाला बनावट नोटा प्रकरणात ताब्यात घेतल्याने अकोला जिल्ह्यात एकच खळबळ उडाली आहे.