अकोला : शिवसेच्या ठाकरे गटाचे आमदार नितीन देशमुख यांना एसीबीने नोटीस पाठवली आहे. मालमत्तेबाबत जबाब नोंदवण्यासाठी हजर राहण्याचे आदेश या नोटीसद्वारे त्यांना देण्यात आले आहेत. येत्या १७ जानेवारीला त्यांना एसीबी कार्यालयात हजर राहण्याचे आदेशही देण्यात आले आहेत.

नितीन देशमुख तेच आमदार आहेत जे शिंदे गटाच्या बंडावेळी गुवाहाटीला न जाता सूरतहून परत आले होते. त्यामुळे सुडापोटी त्यांना ही नोटीस धाडल्याची चर्चा आता रंगू लागली आहे.

आमदार नितीन देशमुख यांच्याविरुद्ध अमरावतीच्या लाचलुचपत प्रतिबंधक विभागाच्या कार्यालयात तक्रार देण्यात आली होती. देशमुख यांच्याकडे कंपनी, कारखाने, यांसह अनेक शेत-जमिनी असल्याचा आरोप करत अकोल्यातील एका व्यक्तीने अमरावतीच्या लाचलुचपत प्रतिबंधक विभागात तक्रार दाखल केली होती.

याप्रकरणी अमरावतीच्या एसीबीने आमदार नितीन देशमुख यांना उपस्थित राहण्याबाबत नोटीस पाठवली आहे. याप्रकरणी जबाब नोंदवण्यासाठी १७ जानेवारी रोजी सकाळी ११ वाजता त्यांना एसीबी ऑफिसमध्ये उपस्थित राहण्यास सांगितले आहे.

याबाबत प्रतिक्रिया देताना नितीन देशमुख यांनी म्हटलं, की बेनामी संपत्तीबाबत मला नोटीस पाठवली आहे. नोटीस पाहून मला हसू आलं. माझ्याकडे बेनामी संपत्ती कुठून आली. जेव्हापासून सरकार बदललं अशा नोटीसा आम्हाला येत आहेत. आम्हाला या गोष्टी अपेक्षित होत्या. आता आम्ही ईडी नोटीसची वाट बघत आहोत, असा टोलाही नितीन देशमुख यांनी लागवला.