रश्मी पुराणीक

मुंबई : शिवसेनेचे नेते आणि मंत्री एकनाथ शिंदे (Eknath Shinde) यांनी बंडाचे निशाण फडकवून शिवसेनेसह महाविकास आघाडी सरकारला जोरदार धक्का दिला आहे. शिवसेनेचे जवळपास ४० आमदार शिंदे समर्थक झाल्याने शिवसेना हवालदील झाली आहे. मुख्यमंत्री उद्धव ठाकरे (uddhav Thackeray) आणि एकनाथ शिंदे समर्थकांकडून राजकीय डावपेच आखले जात आहे. शिंदे गटात आणि शिवसेनेत (Shivsena) संघर्ष सुरु असून राजकीय वर्तुळात हालचालींना वेग आलं आहे. अशातच राज्यात सत्ता स्थापन करण्यासाठी शिंदे गट नवनवीन रणनीती आखत आहे. परंतु, संविधानाच्या शेड्युल १० नुसार बंडखोर आमदारांचा गट हा वेगळा गट स्थापन होऊ शकत नाहीय. त्यामुळे एकनाथ शिंदे गटासमोर मोठा पेच निर्माण झाला आहे.

मिळालेल्या माहितीनुसार, संविधानाच्या शेड्युल १० नुसार बंडखोर आमदारांचा गट हा वेगळा गट स्थापन होऊ शकत नाही. त्यामुळे एकनाथ शिंदे गटासोबत पेच निर्माण झाला आहे. त्यामुळे या आमदारांना कोणत्या तरी पक्षात विलीनीकरण करावे लागेल. एकनाथ शिंदे गटापुढे भाजप किंवा बच्चू कडू यांच्या प्रहार पक्षाचा पर्याय आहे.

त्यामुळेच प्रहारच्या आमदारांना एकनाथ शिंदे त्यांच्यासोबत घेवून गेले, अशीही चर्चा आहे. दरम्यान, प्रहारमध्ये जाण्यास आमदार तयार होतील का ? असा सवाल उपस्थित केला जात आहे. नाहीतर या आमदारांना भाजप पक्षात जाण्याचा शेवटचा पर्याय असेल. त्यामुळे आमदार ह्या दोन पर्यायांपैकी कोणता पर्याय स्वीकारतील ? हाच पेच कायम असल्याची चर्चा राजकीय वर्तुळात आहे.

एकनाथ शिंदेंसह १७ बंडखोर आमदारांचे सदस्यत्व रद्द करण्याची मागणी शिवसेनेने विधानसभेचे उपाध्यक्ष नरहरी झिरवळ यांच्याकडे केली आहे. त्यानंतर शिंदे यांच्याकडूनही जोरदार प्रत्युत्तर देण्यात आलं आहे.

कोणाला घाबरवण्याचा प्रयत्न करताय? तुमची बनवाबनवी आणि कायदा आम्हालाही कळतो! घटनेच्या 10 व्या परिशिष्टाप्रमाणे (शेड्युल) व्हीप हा विधानसभा कामकाजासाठी लागतो, बैठकीसाठी नाही.यासंदर्भात सुप्रीम कोर्टाचे असंख्य निकाल आहेत. असं ट्विट शिंदे यांनी केलं होतं. दोन-तृतीयांश आमदार आमच्यासोबत असल्याने व्हिप जारी करता येत नाही, असंही शिंदे म्हणाले होते.

Edited By - Naresh Shende