सचिन कदम, साम टीव्ही

एकनाथ शिंदे यांच्या शिवसेनेने लोकसभा निवडणुकीच्या दृष्टीने आतापासूनच कंबर कसली आहे. शिवसेनेने काल राज्यातील लोकसभा मतदारसंघाच्या संपर्कप्रमुखांची घोषणा केली. यावेळी शिवसेनेने मुंबईसह ठाणे लोकसभेची जबाबदारी डॉ. श्रीकांत शिंदे यांच्या खांद्यावर सोपवली आहे. या आगामी लोकसभा निवडणुकीबाबत शिंदे सेनेचे आमदार महेंद्र दळवी यांनी महत्त्वाचं विधान केलं आहे. आमदार दळवी यांनी थेट मित्र पक्ष राष्ट्रवादी काँग्रेसला मोठा इशारा दिला आहे.

आमदार महेंद्र दळवी यांनी रायगडमध्ये माध्यमांशी संवाद साधला. यावेळी आमदार दळवी यांनी म्हटलं की, कोकणात सर्वात मोठा पक्ष आमचा आहे. त्यामुळे तो क्लेम आमचा आहे. येणार्‍या लोकसभेची तयारी आमचे नेते करत आहोत. आम्ही सर्व सज्ज आहोत. जिल्हा परिषदेत जे समीकरण झालं, ते आम्ही स्वीकारलं आहे. जागावाटपात आमचा दोन नंबर लागेल. आम्हाला चांगलं स्थान मिळालं नाही तर गेअर बदलण्याची ताकद आमच्यामध्ये आहे'.

अशोक खरात प्रकरणावरही दळवी यांनी भाष्य केलं. दळवी म्हणाले, 'ज्यांनी केलय त्यांना भोगाव लागणार आहे. खरातला पाठिंबा देणाऱ्या लोकांवरही कारवाई होणार आहे. अशोक खरातने महिलांवर अन्याय केला. त्यामुळे संपूर्ण महाराष्ट्र हळहळला आहे'.

मंत्री गोगावले यांचे पुत्र काय म्हणाले?

मंत्री तटकरेंवर होत असलेल्या आरोपांवर मंत्री भरत गोगावले यांचे पुत्र विकास गोगावले यांनीही भाष्य केलं. आकाश चौधरी यांच्या सोबत असलेल्या मंत्री आदिती तटकरे आणि अनिकेत तटकरे यांच्या भागिदारीतील कंपन्यांविरोधात जिल्हा परिषद सदस्य विकास गोगावले यांनी मोठे विधान केलं. 'जयंत पाटील यांनी दिडशे कंपन्या सांगितल्या होत्या. त्या कंपन्या डिमॉलिश कुठे झाल्या. मी बोललो तर हेडलाईन बनेल, त्यामुळे तपासात समोर येईल, असे गोगावले म्हणाले. गोगावले यांच्या आरोपानंतर मंत्री आदिती तटकरे आणि अनिकेत तटकरे काय उत्तर देतात, हे पाहावे लागेल.