रणजीत माजगावकर, कोल्हापूर

Ramdas Kadam News:

राज्यातील राजकीय समीकरण बदलल्यानंतर शिंदे गट आणि ठाकरे गटाचे एकमेकांवर आरोप-प्रत्यारोप सुरु आहेत. आज शुक्रवारी शिंदे गटाचे नेते रामदास कदम यांनी पुन्हा उद्धव ठाकरेंवर मोठा गंभीर आरोप केला आहे. 'आम्ही मिठाई आणि पुष्कळ खोके दिले. मातोश्रीवर खोक्यांचा पाऊस पाडावा लागतो तर मंत्रिपद मिळते, असा गंभीर आरोप रामदास कदम यांनी उद्धव ठाकरेंवर केला आहे. ते कोल्हापुरात पत्रकार परिषदेत बोलत होते. (Latest Marathi News)

शिंदे गटाचे नेते रामदास कदम हे शिवसेना शिंदे गटाच्या राष्ट्रीय महाअधिवेशनासाठी कोल्हापूरच्या दौऱ्यावर आहेत. या दौऱ्यादरम्यान, रामदास कदम यांनी पत्रकार परिषद घेत माध्यमांशी संवाद साधला.

रामदास कदम म्हणाले, 'शिवसेनेची वाटचाल काय असणार याबाबत चर्चा झाली. शिवसेना प्रमुख यांच्यासोबत 55 वर्षे होतो. आता उद्धव ठाकरे आणि त्यांचा सुपूत्र आदित्य ठाकरे यांचं वागणं बरं नाही. त्यांचे टोमणे सुरु आहेत. दिवा विझविण्याच्या आधी फडफडतो असे सुरु आहे'. ('साम टीव्ही'चं व्हॉट्सअ‍ॅप चॅनल जॉईन करण्यासाठी येथे क्लिक करा)

'सकाळी उठल्यापासून पंतप्रधान मोदी आणि मुख्यमंत्री एकनाथ शिंदे यांच्यावर टीका सुरु आहे. उद्धव ठाकरे यांनी आपल्याकडून आत्मपरीक्षण करावे. माझं आणि दिवाकर रावते यांचं पद काढले आणि पुत्राला दिलं. असे बाळासाहेब ठाकरेंनी कधी केले नाही, असेही ते म्हणाले.

'आम्ही आता एकनाथ शिंदे यांचा पर्याय स्वीकाराला आहे. लोकसभा आणि विधानसभा आम्ही जिंकूच, आम्ही आणखी मेहनत घेऊ. जिथं ठाकरे यांची सभा होईल तिथे दुसऱ्या दिवशी माझी सभा होईल. उद्धव ठाकरे यांना ईडी लावली पाहिजे. भ्रष्टाचार बाहेर येईल, असाही गंभीर आरोप रामदास कदम यांनी केला.