- रणजीत माजगावकर

Kolhapur News : कोल्हापूर जिल्ह्यातील शेतकरी सहकारी संघाची जागा जिल्हाधिकाऱ्यांनी नुकतीच ताब्यात घेतल्याने सभासद आक्रमक झाले आहे. जिल्हाधिकाऱ्यांच्या या निर्णया विरोधात सभासदांनी माेर्चा काढला आहे. (Maharashtra News)

कोल्हापूरचे जिल्हाधिकारी राहुल रेखावार यांनी महालक्ष्मी मंदिरा शेजारी असणाऱ्या शेतकरी सहकारी संघाची इमारत नुकतीच ताब्यात घेतलेली आहे. नवरात्राेत्सवात या मंडपाचा भाविकांसाठी उपयोग करणार असल्याचे प्रशासनाकडून सांगण्यात येत आहे.

या निर्णयास शेतकरी सहकारी संघाने कडाडून विरोध केलेला आहे. जिल्हाधिकाऱ्यांच्या पाठीमागून जागा हडपण्याचा प्रयत्न असल्याचा आरोप शेतकरी सहकारी संघाने काेणाचेही नाव ने घेता केला आहे.

जिल्हाधिकाऱ्यांनी मनमानी कारभार करत सुट्टीच्या दिवशी शेतकरी सहकारी संघ ताब्यात घेतल्याचा आरोप ही शेतकरी संघाने केला. दरम्यान आज शेतकरी सहकारी संघाच्या सभासदांनी जिल्हाधिकारी कार्यालयावर मोर्चा काढला.

यावेळी माेर्चेकरांनी कोल्हापूर जिल्ह्याचे पालकमंत्री दीपक केसरकर आणि जिल्हाधिकारी राहुल रेखावार यांच्या विरोधात घाेषणाबाजी केली. या माेर्चातील काही शेतक-यांनी जमीन हडप करण्याचा डाव असल्याचा आराेप पालकमंत्र्यांवर केला.

Edited By : Siddharth Latkar