विनय म्हात्रे

Jayant Patil News:

राष्ट्रवादीत फूट पडल्यानंतर आता पक्षात दोन गट निर्माण झाले आहेत. पक्षफुटीनंतर साधारण चाळीस आमदारांनी शरद पवारांची साथ सोडली आहे. तर काही खासदारांनीही शरद पवारांची साथ सोडली. राष्ट्रवादीच्या फुटीवर शेकाप नेते, आमदार जयंत पाटील यांनी शरद पवारांना एक विनंती केली आहे. 'नको त्या आणि बेईमानी करणाऱ्या लोकांना मोठं करू नका, अशी विनंती शेकाप नेते जयंत पाटील यांनी केली आहे. (Latest Marathi News)

रायगड जिल्हा मध्यवर्ती सहकारी बँकेच्या श्रीवर्धन शाखेच्या उद्घाटन समारंभ रायगडमध्ये पार पडत आहे. या कार्यक्रमाला 'इंडिया' आघाडीच्या वरिष्ठ नेत्यांनी हजेरी लावली आहे. या कार्यक्रमाआधी शेकाप नेते जयंत पाटील यांनी प्रसारमाध्यमांशी संवाद साधला. शेकाप नेते जयंत पाटील यांनी सुनील तटकरे यांना टोला लगावला. 'श्रीवर्धन हे बॅ. ए आर अंतुलेचं बालेकिल्ला आहे. दुसरं कोणाचा नाही, अशा शब्दात जयंत पाटील यांनी सुनील तटकरे यांना टोला लगावला.

जयंत पाटील पुढे म्हणाले, 'रायगडचा इतिहास आणि जिल्ह्यात बॅ. ए आर अंतुले यांनी केलेलं काम नव्या पिढीला समजण्यासाठी या श्रीवर्धनमध्ये शाखा उघडण्यात आली आहे. आम्ही अनंत गीते यांच्या बाबतीत मोठी चूक केली'.

'नको त्या लोकांच्या डोक्यावर हात ठेऊ नका. उगाच कोणाला मोठं करू नका. शरद पवार यांनी मोठं केलं हे अनेक लोकं विसरून जातात. आता नेते मोठे करताना काळजी घ्या. बेईमानी करणाऱ्यांना मोठं करू नका, अशी विनंती जयंत पाटील यांनी शरद पवारांना केली.

'रायगडमध्ये बॅ.ए. आर अंतुलेचं वैभव पुन्हा उभं केलं जाईल. शरद पवारांनी काजू आणि आंब्याला अनुदान दिल्याने कोकण हिरवंगार दिसतोय,असेही त्यांनी सांगितले.