- संजय सूर्यवंशी

महावितरण कंपनीच्या गलथान कारभारामुळे नांदेड जिल्ह्यातील शहापूर या गावात गेल्या आठ दिवसांपासून विद्युत पुरवठा खंडीत असल्याचा आराेप ग्रामस्थांनी केला आहे. महावितरण कंपनीने गावात डीपी बसवून द्यावा अन्यथा आत्मदहन आंदाेलन करु असा इशाला ग्रामस्थांनी प्रशासनास दिला आहे.

नांदेड जिल्ह्यात तापमानाने उंच्चाक गाठला आहे.वाढत्या तापमानाने नागरिक हैराण झाले आहेत. अशा वाढत्या तापमानात दुष्काळात तेरावा महिना म्हणण्याची वेळ नांदेडच्या अर्धापूर तालुक्यातील शहापूर गावकऱ्यांवर आली आहे. ही वेळ आणली आहे महावितरण कंपनीने.

मागील आठ दिवसा पासून शहापूर गावाचा वीज पुरवठा बंद आहे. गावाला आणि शेतीला वीज पुरवठा करणारे विद्युत डीपी जाळले आहेत. त्यामुळे शहापूर गावाला अनेक समस्यांना तोंड द्याव लागत आहे.

वीज पुरवठा खंडित असल्याने शेजारच्या गावातून पाणी आणावं लागतंय. रात्र देखील संपुर्णत: अंधारात काढावी लागत आहे. महावितरण कार्यालयाचे दररोज खेटे मारून या गावातील नागरिक थकले. परंतु अद्याप महावितरण कंपनीने या गावात डीपी बसवून दिला नाही. परिणामी गावकऱ्यांनी आता आत्मदहनाचा इशारा प्रशासनास दिला आहे.

Edited By : Siddharth Latkar