सातारा : साताऱ्यात एकतर्फी प्रेमातून युवकाने अल्पवयीन मुलीवर चाकूहल्ला केल्याची घटना घडली आहे. सातारा शहरातील बसाप्पा पेठ करंजे परिसरात ही घटना घडली आहे. एका शालेय अल्पवयीन मुलीवर चाकूहल्ला झाला आहे. शाळकरी मुलीवर झालेल्या चाकूहल्ल्याने खळबळ उडाली आहे. या घटनेने महिला सुरक्षेचा प्रश्न ऐरणीवर आला आहे.

मिळालेल्या माहितीनुसार, सातारा शहरातील बसाप्पा पेठ करंजे परिसरात एका शालेय अल्पवयीन मुलीवर एकतर्फी प्रेमातून गळ्याला चाकू लावला. त्यानंतर या माथेफिरू युवकाने हल्ला करण्याचा प्रयत्न केला. या सर्व घटनेने शाळा परिसरात एकच खळबळ उडाली.

रस्त्यावरील शेजारी लोकांनी युवकाची समजूत काढण्याचा प्रयत्न केला. मात्र, संबंधित माथेफिरू युवक ऐकण्याच्या मनस्थितीत नव्हता. त्याच्या हातात चाकू असल्याने युवतीच्या जीवास धोका असल्याचे ओळखले. त्यानंतर सातारा शहर पोलीस ठाण्याचे गोपनीय पोलीस कर्मचाऱ्यांनी प्रसंगावधान राखत युवकास ताब्यात घेतलं. यावेळी जमावाने संबंधित युवकाची चांगलीच धुलाई केली.

संबंधित युवकाकडून याआधी देखील पीडित मुलीला त्रास देण्याचा प्रयत्न झाला होता. सध्या या युवकाला शाहूपुरी पोलिसांनी ताब्यात घेतलं आहे. त्याच्यावर गुन्हा दाखल करण्याची प्रक्रिया चालू आहे.

व्हिडिओमध्ये काय दिसत आहे?

माथेफिरू युवक शाळा परिसरात आला. त्यानंतर त्याने मुलीच्या गळाला चाकू लावला. त्यानंतर मुलीने मदतीसाठी याचना केली. माथेफिरु युवकाच्या कृत्याने सारेच हादरले. त्यानंतर घटनास्थळी काही पोलीस साध्या वेशात होते. स्थानिकांच्या मदतीने पोलिसांनी मुलीला माथेफिरुच्या तावडीतून सोडवलं. त्यानंतर या माथेफिरूची लोकांनी चांगलीच धुलाई केली. या घटनेचा व्हिडिओ सोशल मीडियावर प्रचंड व्हायरल झाला आहे.