संजय राऊत, ज्येष्ठ पत्रकार, खासदार, ठाकरेसेनेचा बुलंद आवाज, आणि एक आक्रमक नेता. सेना फुटीनंतर असा एकही दिवस जात नाही की राऊत यांनी एखाद्या मुद्यावरुन राजकीय टिप्पणी किंवा सत्ताधाऱ्यांवर निशाणा साधला नाही आणि त्याची बातमी झाली नाही. मात्र ऐन निवडणुकीच्या तोंडावर राऊतांनी प्रकृतीच्या कारणामुळे दोन महिने माध्यमांपासून दूर राहण्याचा निर्णय जाहीर केला.

राऊतांच्या निकटवर्तीयांनी हळहळ व्यक्त केली. माध्यमापासून दूर राहिले असले तरी ठाकरेसेनेच्या मुखपत्रातून सरकारच्या धोरणावर कठोर शब्दात त्यांचं टीकास्त्र सुरूच होतं. एवढंच नाही तर आजारीपणातही त्यांनी शिवसेनाप्रमुखांच्या स्मृतीदिनी अभिवादन करण्यासाठी हजेरी लावली.

मात्र येत्या 1 डिसेंबरपासून पुन्हा एकदा राऊतांची तोफ विरोधकांवर धडाडणार आहे. मुळात 2019 मध्ये महाविकास आघाडीचं सरकार स्थापन करण्यात राऊतांचा मोठा वाटा होता. माध्यमांसमोर त्यांनी भाजपपासून शिवसेना वेगळी झाल्याची बाजू अगदी भक्कमपणे मांडली होती.

आता महापालिका निवडणुका काही दिवसांवर आल्या आहेत. अशा परिस्थितीत सत्ताधाऱ्यांना आपल्या टीकेने घायाळ करणाऱ्या राऊतांनी राजकारणात पुन्हा अॅक्टीव मोडवर येणं. सत्ताधाऱ्यांसाठी धक्का मानला जातोय. आता आजारावर मात करून निवडणुकीच्या मैदानात उतरणारे राऊत माध्यमांसमोर पक्षाची भूमिका तेवढयाच कणखरपणे मांडतात ते बघणं औस्तुक्याचं असेल.