सांगली/कराड : सांगली जिल्ह्यातील शाळगाव एमआयडीसीतील म्यानमार केमिकल कंपनीत वायू गळती झाल्याने 9 लोक अत्यवस्थ झाले होते. यामधील दोन महिलांचा उपचारादरम्यान मृत्यू झाल्याची घटना घडली आहे.

सांगली (Sangli News) जिल्ह्यातील शाळगाव एमआयडीसीमध्ये असलेल्या म्यानमार केमिकल कंपनीत रात्रीच्या सुमारास वायू गळती झाली होती. वायू गळती झाल्यामुळे कंपनीत काम करणाऱ्या कामगारांना त्रास जाणवू लागला होता. दरम्यान वायू गळतीमुळे ९ जणांना त्रास जाणवू लागल्याने त्यांना लागलीच रुग्णालयात उपचारासाठी दाखल करण्यात आले होते. मात्र यातील ७ जणांना अत्यवस्थ जाणवू लागल्याने रात्री (Karad) कराड येथील सह्याद्री हॉस्पिटलमध्ये उपचारासाठी दाखल आले आहे.

दोन महिलांचा मृत्यू
वायू गळतीमुळे अधिक त्रास जाणवू लागल्याने सुचिता उथळे (वय ५०, राहणार येतगाव, जिल्हा सांगली) व नीलम रेठरेकर (वय २६ रा. मसूर, जिल्हा सातारा) या दोन महिलांचा मृत्यू झाला आहे. तर सध्या सह्याद्री हॉस्पिटलमध्ये अन्य पाच रुग्णांवरती आयसीयूमध्ये उपचार सुरू आहेत.