सांगली : सांगली जिल्हा मध्यवर्ती सहकारी बॅंकेची (sangli dcc bank) येत्या शनिवारी (ता. १९) ऑनलाईन (online) पद्धतीने विशेष सर्वसाधारण सभा बाेलविण्यात आली आहे. या सभेपुर्वीच सांगली (sangli) जिल्ह्यात त्याचे पडसाद उमटू लागले आहेत. या सभेतील विविध विषयांवर शेतकरी (farmer) व शेतक-यांच्या (farmers) संघटना नाराज झाल्या आहेत. शेतकऱ्याच्या जिल्हा बँकेत (dcc bank) राजकीय नेत्यांना सवलत आणि शेतकरी वाऱ्यावर अशी दुटप्पी भूमिका बॅंकेची झाल्याचे मत शेतकरी व्यक्त करु लागले आहेत. (sangli dcc bank latest marathi news)

जिल्ह्यातील माेठ्या नेत्यांच्या संस्थांना आर्थिक अडचणीतून बाहेर काढण्यासाठी जिल्हा बॅंकेच्या नियोजनात नेत्यांच्या संस्थांचे कर्जावरील सुमारे १०० कोटीचे व्याज माफीची योजना आहे. याशिवाय अनेक माेठ्या नेत्यांच्या संस्थांचे ७६ कोटी रुपये कर्ज राईट ऑफचा निर्णयही घेतला जाण्याची शक्यता आहे. यामुळे शेतकरी वर्गात नाराजी पसरली आहे.

त्यातच बॅंकेचे सीईआे जयवंत कडू-पाटील यांनी अचानक आपल्या पदाचा राजीनामा दिल्याने सहकार क्षेत्रात खळबळ उडाली आहे. दरम्यान बँकेने चुकीच्या पध्दतीने माेठ्या नेत्यांच्या संस्थांना कर्ज दिले. या संस्था सध्या बंद आहेत. बँकेने या संस्था ताब्यात घेतल्या असल्या तरी या संस्थांकडे थकबाकीचा आकडा वाढतच आहे. कारखाने ताब्यात घेऊन काय फायदा? उलट याने थकबाकीदार संस्थांकडील व्याज बुडाले, तरीही कारखाने खरेदीसाठी कोट्यवधींचा खर्च, देखभाल दुरुस्ती, वीज बिल आदीसाठी भुर्दंड बॅँकेवरच बसतोय. शेतकऱ्याच्या जीवावर बँक चालते आणि शेतकऱ्यांना वाऱ्यावर सोडले जात आहे. त्यामुळे स्वाभिमानी शेतकरी संघटना येत्या शनिवारी (ता. १९) बोंबा बोंब आंदोलन छेडणार असल्याची माहिती महेश खराडे यांनी दिली. जिल्हा बॅंकेच्या कारभाराविषयी शेतकरी संघटनेचे सुनील फडतरे यांनी देखील नाराजी व्यक्त करीत बॅंक शेतक-यांच्या हिताचा विचार करीत नसल्याचे त्यांनी नमूद केले.

शेतकऱ्यांना जिल्हा मध्यवर्ती सहकारी बँक वाऱ्यावर सोडत असेल आणि राजकीय नेत्यांना मोठे करत असेल तर शिवसेना शेतकऱ्यांच्या बाजूने उभी राहील असे शिवसेना जिल्हा अध्यक्ष संजय विभूते यांनी नमूद केले.

Edited By : Siddharth Latkar