सांगली : दारू पिऊन शिव्या दिल्याच्या कारणावरून ३२ वर्षीय युवकाला लाथाबुक्क्यांनी तसेच उसाच्या दांडक्याने मारहाण करण्यात आली. या मारहाणीत युवकाचा जागीच (Death) मृत्यू झाला. सांगलीच्या (Sangali) वाळवा तालुक्यातील वाटेगाव परिसरात ही घटना घडली. या घटनेमुळे वाटेगाव परिसर हादरून गेला आहे. प्रवीण प्रकाश साळुंखे (वय ३२) असे खून झालेल्या युवकाचे नाव असून याप्रकरणात कासेगाव पोलिसांनी (Police) दोन जणांना अटक केली आहे. (Sangali Latest Crime News)

गणेश उर्फ बारक्या मधुकर चव्हाण (वय ३२) मोहन उर्फ बाळ्या चव्हाण (वय २४) असं अटक करण्यात आलेल्या संशयित आरोपींचे नाव आहे. मृत प्रवीण याचे वडील प्रकाश साळुंखे यांनी कासेगाव पोलिसांत दिलेल्या फिर्यादीनुसार, सोमवारी (३० मे) वाटेगाव येथील एका दारूच्या दुकानात रात्री साडेआठच्या सुमारास गणेश चव्हाण, मोहन चव्हाण व मयत प्रवीण साळुंखे हे तिघे मित्र दारू पिण्यासाठी बसले होते. दारू पीत असताना बोलता-बोलता एकमेकांच्या मध्ये शिवीगाळ सुरू झाली.

यावेळी शिव्या दिल्याच्या कारणावरून आरोपी गणेश आणि मोहन यांनी प्रवीणला मारहाण करण्यास सुरुवात केली. आरोपींनी मयत प्रवीण याला दुकानातून बाहेर काढून वाटेगाव येथील भाटवाडीकडे जाणाऱ्या घोगावती ओढ्याच्या पात्रात नेत उसाच्या दांडक्याने मारहाण केली. या मारहाणीत प्रवीणचा जागीच मृत्यू झाला. घटनेनंतर संशयित आरोपी गणेश व मोहन हे दोघे फरार झाले.

दरम्यान, या घटनेची माहिती मिळताच पोलिसांनी तातडीने घटनास्थळी धाव घेतली. मृत प्रवीणचा मृतदेह ताब्यात घेत पोलिसांनी घटनेतील संशयित आरोपीला अटक केली. मयत प्रवीण हा दारूच्या आहारी गेला होता. तर मोहन आणि गणेश हे पण व्यसनाधीन आहेत. या हत्याकांडामुळे वाटेगाव परिसरात घबराटीचे वातावरण पसरले आहे.